1921 оны Ардын хувьсгалын дараа Сутай уулын хошуу 1923-1931 он хүртэл найман жил оршин тогтнож байсан бөгөөд энэ хугацаанд хошуу даргаар Гүнсэнсүрэн, Галсанзэвэг, Норовсамбуу, Гомбосүрэн, Дамдинжав, Довчин, Чоймжир нар ажиллаж байсан. 1931-1963 онд Дарви сум нь Хайрхан, Хишигт, Мөрөн, Буянт сумуудыг нэгтгэн өргөжсөн. Социализмын үед хамтын аж ахуйн давуу талыг үзүүлэх шаардлагын үүднээс 1936 оноос улс орон даяар нэгдэлжих хөдөлгөөн өрнөж олон тооны нэгдэл байгуулагдсан эцэстээ тэдгээр аж ахуй нэгжүүд өргөжиж сум нэгдэл болон 1990 оныг хүртэл төвлөрсөн төлөвлөгөөт эдийн засагтайгаар мал аж ахуй газар тариалан хослуулан хөгжиж ирсэн. 1990 онд сумын Ардын депутатын хурал, Ардын депутатын хурлын гүйцэтгэх захиргаа нь нам төвтэй улс төрийн хүчнээс татгалзсанаар төрийн захиргааны үүрэг гүйцэтггэх болсон. 1992 оны УИХ-ын сонгуулийн үр дүн, монгол улсын үндсэн хуулийн дагуу Сумын засаг даргын тамгын газар нь найман орон тоотойгоор байгуулагдан төрийн захиргааны үйлчилгээ явуулж эхэлсэн. 1931 оноос хойш сумын Засаг даргаар С.Рагчаа, Ш.Дамдин, Т.Гомбосүрэн, Ч.Даваасамбуу, С.Пунцаг, Р.Дармаа, Н.Батдэлгэр, Т.Чүлтэм, Б.Давга, Р.Галсан, Д.Даш, Д.Баарай, Ө.Чимэд, И.Даваа, Н.Жадамба, С.Отгон, Ц.Баахүү, П.Дамчаабазар, Д.Мөнхцоож, Д.Түмэндэмбэрэл, Д.Ганэрдэнэ, О.Ганцоож, Б.Хайдав нар ажиллаж байна.