Монгол Улсын Гадаад харилцааны яам нь: • Монгол Улсын аюулгүй байдал, тусгаар тогтнол, бүрэн эрхт байдлыг олон улсын харилцааны түгээмэл зарчим, эрх зүйн хувьд баталгаажуулах, • Үндэсний хөгжил дэвшлийг хангах таатай гадаад орчныг бүрдүүлэх, • Монгол Улсын нэгдмэл, залгамж чанартай гадаад бодлогыг хэрэгжүүлэх ажлыг зохион байгуулах, • Монгол Улсын төр, засгийн албан ёсны байр суурийг илэрхийлэх зэрэг чиг үүргийг хэрэгжүүлдэг төрийн захиргааны төв байгууллага юм. 2024 онд Ерөнхийлөгчийн түвшинд 15, УИХ-ын даргын түвшинд 3, Ерөнхий сайдын түвшинд 8, Гадаад харилцааны сайдын түвшинд 8 айлчлал хэрэгжиж, Засгийн газар хоорондын комиссын 6 хуралдаан, ГХЯ-д хоорондын 19 зөвлөлдөх уулзалт зохион байгуулагдсан. Монгол Улс нийт олон талт 6 гэрээнд нэгдэн орох дотоодын процедураа хангасан бол Засгийн газар хоорондын 16 гэрээ байгуулав. Түүнчлэн, байгууллага хоорондын 108 гэрээ байгуулж бүртгэсэн бол гэрээний төсөлд санал өгөх, орчуулгыг хянах зэрэг нийт байгууллага хоорондын 137 гэрээ байгуулахтай холбоотой үйл явцад оролцoж, давхардсан тоогоор Монгол Улсын 44,607 иргэн консулын үйлчилгээ авсан. Үүнээс үзвэл өнгөрсөн оны туршид • 11 хоног тутамд өндөр, дээд түвшний айлчлал хэрэгжүүлж, • 15 хоног тутамд Засгийн газар хоорондын болон Гадаад харилцааны яамд хоорондын зөвлөлдөх уулзалт зохион байгуулагдаж, • 2.6 өдөр тутамд нэг олон улсын гэрээ байгуулах үйл явцад оролцож, • Өдөрт 122 иргэнд консулын үйлчилгээ үзүүлжээ.