Шинэ-Идэр сум нь 1924 онд байгуулагдсан. Хөвсгөл аймгийн урд хэсэгт Улаанбаатар хотоос 795 км, аймгийн төвөөс 123 км зайд байрладаг. Аймгийнхаа Галт, Жаргалант, Бүрэнтогтох, Төмөрбулаг, Завхан аймгийн Их-Уул сумдтай хөршлөн оршдог. Газарзүйн хувьд Хангайн уулархаг их мужийн тэгш өндөрлөгт, тарвагатайн нурууны арын бэсрэг уулс зонхилсон. Сумын нутаг дэвсгэр нь Булнай нуруу /2500м/, Цагаан-Ус, Баянзүрх, Дашдэрчин уул /2554 м/ гэх мэт уулархаг нуруудтай. Сангийн далай, Зүүн нуур гэх мэт томоохон нууруудтай. Сангийн далай, Баяннуур, Баянзүрх, Нүхт гэсэн 4 багийн нийт 911 өрхөд 3088 хүн амьдардаг. Хүн амын зонхилох ястан нь халх. Сумын төв нь засаг захиргааны үйлчилгээний үүрэг давамгайлсан суурин юм. Сумын төв дулаан хангамжийн нэгдсэн сүлжээтэй. Сумын төсөвт байгууллага, аж ахуйн нэгж, худалдаа, үйлчилгээний газрууд, айл өрхүүд төвлөрсөн дулаан хангамжид холбогдсон. Тус сум нь Хөвсгөл далай, Архангайн Тэрхийн цагаан нуурын аялал жуулчлалын зам дагуу байршилтай аялал жуулчлал үйлчилгээ хөгжүүлэх боломжтой. Зүүн нуур, Шивэртийн Чих толгойд тохилог сайхан жуулчны баазтай.