Монгол улсад 1921 онд Засгийн газрын 24 дүгээр хурлаар баталсан Судар бичгийн хүрээлэнгийн дүрмийн 1-р зүйлд: Музей байгуулах тухай тусган оруулснаар үзмэрийн зүйлсийг цуглуулах ажил өрнөж, орчин цагийн Музейн үндэс суурь тавигдсан. Төр засгаас аймаг орон нутагт түүх соёлын өвийг хамгаалан цуглуулж, ард олныг соён гэгээрүүлэх зорилгоор БНМАУ-ын Гэгээрлийн Яамны Сайдын 1949 оны 04 дүгээр сарын 08 ний өдрийн 110 дугаар тушаалаар Ховд аймагт “Орон нутаг судлах кабинет” байгуулах шийдвэр гаргасан байна. Ховд аймгийн Музей нь анх 1950 онд “Орон нутаг судлах кабинет” нэртэй 2 орон тоо, 300 гаруй үзмэртэй байгуулагдаж байсан. 1967 онд “Аймгийн орон нутаг судлах музей”, 1991 онд “Аймгийн Музей”, Ховд аймгийн Иргэдийн төлөөлөгчдийн хурлын 2024 оны 8 дугаар сарын 02-ний өдрийн 17/03 тогтоолоор “ГАЛДАН БОШГОТ ХААНЫ НЭРЭМЖИТ” Ховд аймгийн Музей болон өргөжин, Баруун Монголын ард түмний түүх соёл, зан заншлыг харуулсан эд өлгийн зүйлсийг олон нийтэд сурталчлан ажиллаж байна. Манай байгууллага 3100 гаруй үзмэртэй, жилд 7000-9000 орчим үзэгч сонирхон үздэг. Музей нь Байгаль газарзүй, Эртний түүх, Манжийн үе, Монгол ахуй, Угсаатан, Алдартан, Шашин, Боловсрол гэсэн танхимуудад түшиглэн үйл ажиллагаагаа тогтвортой явуулж байна.