Тус хүүхдийн цэцэрлэг нь 1953 оны 06 сарын 01-нд Хөвсгөл аймгийн захиргааны дэргэд 3 гэрт 25 хүүхэдтэй 5 ажилчинтайгаар байгуулагдаж үйл ажиллагаагаа эхлүүлсэн түүхтэй. Мөрөн сумын 1 дүгээр цэцэрлэг хэмээх их айлын тулгын чулууг тавилцаж, өрхийг татан, үүдийг нээсэн анхны болон үе үеийн багш сурган хүмүүжүүлэгчид нь эрхлэгч Лувсанцэрэн, Цэрмаа, Батсуурь, Цэнд-Аюуш, Гүнсэнлхам, Жанцмаа, Янжмаа, Норчгоо, Юмжирмаа, Лхамдолгор хүмүүжүүлэгч багш Норжмаа, аймгийн анхны мэргэжлийн багш Ч. Лхамжав нар юм. 1960 онд 350000 төгрөгийн улсын төсвөөр өнөөдрийн цэцэрлэгийн 1-р барилга сууриа тавьж 1961 оны намар ашиглалтанд орсноор 100 гаруй хүүхэд хүлээн авах хүчин чадалтай болж өргөжсөн. Энэ үеэс хүүхдийг насаар нь ангилан хүмүүжил сургалтын ажлыг зохион байгуулж эхэлсэн нь түүхэн том ололт байлаа. 2017 онд цэцэрлэгийн 2 дугаар барилга ашиглалтад орж, өргөжин тэлсэн. 2003 онд анх удаа цэцэрлэгийнхээ түүхт 50 жилийн ойг, 2013 онд 60 жил, 2023 онд түүхт 70 жилийн ойгоо тэмдэглэсэн зэрэг түүхэн хуудсыг дурьдаж болно. Тус цэцэрлэг нь эдүгээ 70 гаруй жилийн хугацаанд үйл ажиллагаагаа амжилттай явуулж Хөвсгөл аймгийн Мөрөн сумын Улсын тэргүүний 1 дүгээр цэцэрлэг хэмээх алдар нэртэйгээр 9 бүлэгт 400 гаруй хүүхдүүдийг сургаж хөгжүүлэн, Эрхлэгч Г.Мөнхцэцэгийн удирдлага дор 34 албан хаагчтайгаар үйл ажиллагаагаа амжилттай явуулж байна.