Монгол улс Татварын зорилгоор ил тод байх, харилцан мэдээлэл солилцох Глобал форумд 2018 онд нэгдэн орсон бөгөөд Санхүүгийн дансны мэдээлэл болон улс бүрээрх үнэ шилжилтийн тайланг автоматаар харилцан солилцох, олон улсын стандартыг хэрэгжүүлэх олон талт хэлэлцээрт Монгол Улсыг төлөөлж Татварын ерөнхий газрын дарга Ч.Чимидсүрэн 2025 оны 03 дугаар сарын 06-ны өдөр гарын үсэг зурлаа.
Энэхүү хэлэлцээрт гарын үсэг зурснаар Монгол Улс татварын ил тод байдлыг хангах, татвараас зайлсхийх явдалтай тэмцэх олон улсын нийтлэг жишиг стандартад нэгдэж буйг илэрхийлж байна. Ингэснээр манай улс олон улсын шилдэг туршлагыг нэвтрүүлж, санхүүгийн системийнхээ найдвартай байдлыг нэмэгдүүлж, хил дамнасан эдийн засгийн харилцаанд итгэлцлийг бэхжүүлж байна.
Нийтлэг тайлагналын стандарт(CRS)-ыг хэрэгжүүлснээр Монгол Улс бусад улс орнуудтай санхүүгийн дансны мэдээллийг автоматаар солилцох боломжтой болж, илүү шударга, ил тод татварын орчин бүрдүүлэх нөхцөл хангагдаж байна.
