Сум орон нутгийн ажлын ачааны хүндийг үүрч, ард иргэдэд төрийн үйлчилгээг тэгш хүртээмжтэй, түргэн шуурхай хүргэн ажилладаг хүмүүс бол Засаг даргын Тамгын газрын хамт олон билээ. ЗДТГ-ын албан хаагчид нь төрийн үйлчилгээг иргэдэд хүргэхээс гадна, сум орон нутгийн бүхий л ажлыг нуруундаа үүрч, төрийн бодлогын залгамж халааг хадгалж явдаг өндөр хариуцлагтай хүмүүс. Өдөр тутмын энгийн ажил хэргээс гадна сум орон нутгийн тохижилт үйлчилгээ, хөрөнгө оруулалт бүтээн байгуулалт, нийтийг хамарсан нийгмийн ажил, баяр наадам, арга хэмжээ зохион байгуулах, байгаль цаг уурын гэнэтийн болон давагдашгүй хүчин зүйл болох хүчтэй салхи шуурга, цас зуд, үер ус, гал түймэр, хүн малын халдварт өвчин зэрэг сум орон нутгийн хэмжээнд тулгамдсан бүхий л асуудлыг шийдвэрлэхэд тэд л хамгийн түрүүнд зүтгэдэг. Энэ утгаараа ЗДТГ, түүний хамт олон нь бусад байгууллага, тэдгээрийн албан хаагчдаас ажлын ачаалал, үүрэг хариуцлага өндөртэй ажилладаг онцлогтой. Сумын ЗДТГ нь одоогоор шууд удирдлагатай 19, босоо удирдлагатай 10, багийн Засаг дарга 5, нийт 34 ажилтан албан хаагчидтайгаар төрийн үйлчилгээг иргэдэд түргэн шуурхай хүргэн ажиллаж байна.