Түргэн сум нь 1925 онд БНМАУ-ын бага хурлын тэргүүлэгчдийн 5-р тогтоолоор Чандмань уул аймгийн Төгс буянт уулын хошуунаас Дэлгэрмөрөний дэнж дээр Баянхайрхан сум нэртэй байгуулагдсан. Анх 9 баг, 603 өрх, 2600 хүн амтай, 97800 толгой малтай байв. 1931 оноос Түргэн сум гэж нэрлэгджээ. 1959 онд сумын төв Хавцлын боом гэх газар нүүж иржээ. Засаг захиргаа, нутаг дэвсгэрийн нэгжийн хувьд Баянхайрхан, Рашаант, Эрдэнэхайрхан гэсэн 3 багтай. Түргэн сум нь 225342га нутаг дэвсгэртэй, төсвийн таван байгууллагатай. 2024 оны жилийн эцсийн статистик үзүүлэлтээр 622 өрх, 2090 хүн амтай, 139522 толгой мал тоолуулжээ. Аймгийн төвөөс 35 км-т орших бөгөөд 32 км хар замаар холбогдсон, 18000 орчим га ойн сан бүхий талбайтай. Сумын иргэд ихэвчлэн мал аж ахуй, газар тариалангийн үйлдвэрлэл эрхэлдэг.