БАЯНШИШГЭД СУМ ДУНДЫН ОЙН АНГИЙН ТАНИЛЦУУЛГА. Засгийн газрын 255 дугаар тогтоол, аймгийн Иргэдийн Төлөөлөгчдийн Хурлын Тэргүүлэгчдийн 2011 оны 11 дүгээр сарын 03-ны өдрийн 123 дугаар тогтоол, “Ойн тухай” хуулийн 17 дугаар зүйлийн 17.2.8 дугаар заалтын дагуу аймгийн Засаг даргын 2012 оны 01 дүгээр сарын 25-ны А/14 дүгээр захирамжаар анх үүсгэн байгуулагдсан. Арбулаг, Баянзүрх, Улаан-Уул, Рэнчинлхүмбэ, Цагааннуур гэсэн 5 сумын 1076706 га ойн санг хариуцан үйл ажиллагаа явуулж байна. Сум дундын ойн ангийн үүрэг чиглэл: Манай ойн анги нь хариуцан ажилладаг сумдын ойн санд Ойн тухай хуулийн 18.3-т заасан эрх үүргийг хэрэгжүүлэн ажилладаг. 18.3.1. Ойгоос мод бэлтгэх талбай тусгаарлах; 18.3.2. Бэлтгэсэн мод, модон материалд гарал үүслийн гэрчилгээ олгох; 18.3.3. Сум, дүүргийнхээ мод бэлтгэсэн болон хөнөөлт шавж, өвчинд нэрвэгдсэн газрын ойжуулалтын ажил, ойн хөнөөлт шавж, өвчний тоймчилсон судалгаа гүйцэтгэх; 18.3.4. Ойг нөхөн сэргээх, ойжуулах, мод үржүүлэх ажил эрхлэн модны үр, тарьц, суулгац худалдаалах, ойд учирсан хохирлын экологи эдийн засгийн үнэлгээ тогтоох; 18.3.5. Ойн арчилгааны гэрэлжүүлэх, тохируулах огтлолтыг гүйцэтгэх болон сум, дүүргийн ойн хөтөлбөр, ойн менежментийн төлөвлөгөөний хэрэгжилтийг зохион байгуулж хангуулах; 18.3.6. Ойн сангийн тодорхой хэсгийг эзэмшигч ойн нөхөрлөл, аж ахуйн нэгж, байгууллагад мэргэжил, арга зүйн зөвлөгөө өгөх; 18.3.7. Ойн баялгийг ашигласны төлбөр, хураамжийг ногдуулж, тэдгээрийн гүйцэтгэлийг хангах; 18.3.8. Аймаг, сумын түвшинд ойг хамгаалах, зохистой ашиглах, нөхөн сэргээх, үржүүлэх талаар явуулж байгаа бодлогыг хэрэгжүүлэх, үр дүнг тооцох; 18.3.9. Мэдээллийн санг эрхлэх; 18.3.10. Иргэдэд ойг хамгаалах, зохистой ашиглах, нөхөн сэргээх, үржүүлэх болон ой, хээрийг түймрээс хамгаалах чиглэлээр сургалт, сурталчилгаа явуулах; 18.3.11. Ойг аюулт үзэгдэл, гамшгаас урьдчилан сэргийлэх, хамгаалах, тэдгээртэй тэмцэх арга хэмжээг хэрэгжүүлэх; 18.3.12. Ойн нөхөрлөл, аж ахуйн нэгж, байгууллагын ойн менежментийн төлөвлөгөөний биелэлтийг хангуулж, зөрчлийг арилгах; 18.3.13. Ойн анги нь төсөв, түүнчлэн сургалт, мэргэжил, арга зүйн зөвлөгөө үзүүлсний болон өөрийн ажил, үйлчилгээний орлого зэрэг эх үүсвэрээс санхүүжих; 18.3.14. Нутаг дэвсгэрийнхээ хэмжээнд ойг хамгаалах, зохистой ашиглах, нөхөн сэргээх, үржүүлэх болон ой, хээрийг түймрээс урьдчилан сэргийлэх үйл ажиллагааг зохион байгуулах; 18.3.15. Ой, хээрийн түймрийг унтраах ажиллагаанд сумын нутгийн захиргааны байгууллагатай хамтран ажиллах.