Сүмбэр сум нь хуучин Сэцэн хан аймгийн Боржигин цэцэн вангийн хошууны төв бөгөөд БНМАУ-ын Бага хурлын 1931 оны 02 дугаар сарын 07-ны өдрийн 05 дугаар хуралдааны тогтоолоор хошуудыг татан буулгаж , Засаг захиргааны нэгжийг өөрчлөн 13 аймаг байгуулж өргөжүүлэхэд Оцол Сансар уулын хошууг Төв, Дорноговь аймгийн харьяанд хуваасан байна. Ийнхүү 1931 онд Сансар, Баянбулаг, Их хонгор, Баян-Эрхтий сумдыг нэгтгэж, Төв аймгийн Говьсүмбэр сум /одоогийн Сүмбэр/ сумыг байгуулсан түүхтэй. Сүмбэр сум нь 1931-1956 он хүртэл 25 жил Төв аймгийн харьяалалд, 1956-1991 он хүртэл 25 жил Дорноговь аймгийн харьяалалд байжээ. 1991 онд Улсын Бага хурлын 46 дугаар тогтоол гарч, Сүмбэр сумыг Дорноговь аймгийн харьяаллаас өөрчилж, Чойр хот байгуулагдахад Чойр хотын Сүмбэр хороо болон өөрчлөгдөж, 1994 онд Улсын Их хурлын 32 тогтоолоор Чойр хотыг тус хотын хилийн цэсээр Говьсүмбэр аймаг болгон өөрчлөхөд Сүмбэр сум болон зохион байгуулагдсан түүхтэй.