Анх 1946 оны 8-р сарын 24-ний өдрийн БНМАУ-ын Ардын бага хурлын тогтоолоор Баян-өлгий аймгийн Ховд сумыг байгуулсан. Газар нутгийн байдал, амьдралын гол сурвалж нь тариалан эрхлэх боломж зэргийг үндэслэн хөдөлмөрчдийн хүсэлтийн дагуу Ховд сумыг 1955 онд Ховд аймгийн харьяанд шилжүүлжээ. Тус сум нь Засаг захиргааны анхан шатны нэгж, Баянбулаг, Цагаанбургас, Баруунсалаа, Улаанбураа Дунд ус, гэсэн 5 багтай, мал аж ахуй, газар тариаланг хослон эрхэлдэг. 2025 оны жилийн эцсийн байдлаар 931 өрхөд 3924 хүн амьдардаг. 2025 онд 238382 толгой мал тоолуулсан. Газар нутгийн хэмжээ 282058 га, үүнээс Хөдөө Аж Ахуйн газар 234325,73 га байна. Үүнээс хадлангийн талбай. 480 га,бэлчээрийн газар 231515,33 га байна. Нийт 231515,33 га бэлчээрийн 40.7 хувь буюу 94226,74 га нь цөлжүү хээрийн, 26.1 хувь буюу 60425,5 га нь өндөр уулын, 33,2 хувь буюу 76863,09 га нь уулын хээрийн бэлчээр эзэлдэг. Ховд сумын хүн амын тоогоор эхний 6-д, газар нутгийн хэмжээгээр 13-д ордог,аймгийн төвөөс 45 км зайд байрладаг. Суманд Нутгийн удирдлагын ордон, Ерөнхий боловсролын сургууль, Эрүүл мэндийн төв, Соёлын төв, Хүүхдийн цэцэрлэг, Цаг уур орчны шинжилгээний Дунд ус өртөө, Мал эмлэгийн үржлийн 2 нэгж, Хаан банк, Төрийн банк, Мусалман шашны мешит, шатахуун түгээх 2 станц, ААН байгууллага 61, Иргэний нийгмийн байгууллага 5, улс төрийн 2 нам тус тус үйл ажиллагаа явуулж байна.