Тэртээ 1925 онд БНМАУ-ын Засгийн газрын тогтоолоор Цэцэрлэг мандал аймагт 7 сургууль байгуулахаар шийдвэрлэсний нэг нь манай сургууль байсан бөгөөд Аргын тооллын 1925 оны 8 дугаар сар, билгийн тооллын намрын дунд сарын шинийн нэгэнд “Хошууны тэнхим” нэртэй, 25 сурагч, 1 гэртэй байгуулагдаж, анхны багш нь Сүрьеэ Мээрэн хэмээх эрхэм хүмүүн ажиллаж байв. Өдгөө манай сургууль зуун насныхаа босгон дээр 700 гаруй суралцагч, 80 гаруй багш ажилтантай болтлоо өргөжин тэллээ. Түүхэн энэ өдөр Рашаантын сургуулиар овоглосон хүн бүхний баярын өдөр, бахархлын өдөр тохиож байна. "...Сургуулийн ой гэдэг Их эрдмийн баяр Эрдэм сургасны баяр Эрдэм сурсны баяр..." Дэлхийн өнцөг булан бүрд сэтгэл догдлон суугаа үе, үеийн төгсөгчид, зуун зуун шавь нартаа Рашаант сум үүсгэн байгуулагдсны 102, мэргэн гүн М.Гомбожавын нэрэмжит ерөнхий боловсролын сургуулийн түүхт 100 жилийн ойн баяр наадмын мэндийг өргөн дэвшүүлье.