Олон улсын хөдөлмөрийн байгууллагаас жил бүрийн 04 дүгээр сарын 28-ны өдрийг “Ажлын байран дахь Хөдөлмөрийн аюулгүй байдал, эрүүл ахуйн дэлхийн өдөр болгон тэмдэглэж байхаар шийдвэрлэсэн. Манай улс 2012 оноос хойш улс орон даяар жил бүрийн 04 дүгээр сард Хөдөлмөрийн аюулгүй байдал, эрүүл ахуйн сарын аян өрнүүлж үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх зорилгоор хууль тогтоомжийг сурталчлах, ажилтан, ажил олгогчийг чадавхжуулах, туршлага солилцох зэрэг олон арга хэмжээг зохион байгуулж хэвшээд байна. Энэ жил “Хөдөлмөрийн аюулгүй байдал, эрүүл ахуйн сарын аян-2025” арга хэмжээг Олон улсын байгууллагаас гаргасан “Хөдөлмөрийн аюулгүй байдал, эрүүл мэндийн хөгжил: Хиймэл оюун ухааны хэрэглээ ба цахимжилт” уриан дор зохион байгуулахаар шийдвэрлэсэн бөгөөд сарын аяндаа үр бүтээлтэй идэвхтэй оролцохыг уриалж байна.