БНХАУ-ын Ляньюньган хотноо 2025.07.02-ны өдрөөс 04-ний өдрүүдэд зохион байгуулагдсан Монгол Улс, БНХАУ-ын Гаалийн байгууллагын хамтарсан шалгалтын ажлын хэсгийн 11 дүгээр хуралдаанд Монгол Улсын гаалийн байгууллагын албан хаагчид оролцлоо. 

Тус үйл ажиллагаанд Гаалийн ерөнхий газрын Хяналт бүрдүүлэлтийн газрын даргын албан үүргийг түр орлон гүйцэтгэгч Б.Даваасүрэн тэргүүтэй 5 төлөөлөгч, БНХАУ-ын Гаалийн ерөнхий газрын Боомтын хяналт, шалгалтын газрын орлогч дарга Дун Хуй тэргүүтэй 8 төлөөлөгч болон ажлын хэсгийн 13 гишүүн хуралдлаа. ​

Монгол Улсын болон БНХАУ-ын гаалийн байгууллагын хамтарсан шалгалтын ажлын хэсгийн аравдугаар хуралдааны Протоколын хэрэгжилт, манифест солилцох ажлын явц, цахим мэдээлэл дамжуулах шинэ системд шилжүүлэх ажлын талаар санал солилцлоо. "Монгол Улсын гаалийн ерөнхий газар, БНХАУ-ын гаалийн ерөнхий газар хоорондын хил дамнан авто замаар тээвэрлэгдэж буй зарим нэр төрлийн бараанд хийсэн гаалийн хяналт, шалгалтын үр дүнг харилцан хүлээн зөвшөөрөх” туршилтын төлөвлөгөөний төслийн эхний хэлэлцүүлгийг хийлээ.