Батлан хамгаалах салбар ажилтан, алба хаагчдынхаа нийгмийн хамгааллыг сайжруулах бодлогын хүрээнд 100 орчим алба хаагчдад орон сууцны урьдчилгаа болох 20 сая төгрөгийн батламжийг гардууллаа. 

     Тус хөтөлбөр нь Монгол Улсын Ерөнхийлөгч Ухнаагийн Хүрэлсүхийн хэрэгжүүлж буй “Хүн төвтэй төр” нийгмийн хамгааллын шинэчлэл, Монгол Улсын Засгийн газраас баримталж буй хүний хөгжлийг дээдэлсэн “Хүн төвтэй бодлого”, Батлан хамгаалахын сайд Д.Батлутын Зэвсэгт хүчний офицер, ахлагч, ажилтан, албан хаагчдын нийгмийн хамгааллыг сайжруулахаар дэвшүүлсэн бодлогын хүрээнд хийгдэж буй 3 багц арга хэмжээний нэг юм. 

    Шинэ Засгийн газрын хамгийн том мега төсөл бол хүний хөгжил. Энэ хүрээнд Монгол Улсын Засгийн газраас нийгмийн хамгааллын цогц реформыг эрчимжүүлэх замаар үндэсний сөрөн тэсвэрлэх чадавхыг бүх түвшинд бэхжүүлэхийг зорьж байна. 

    УИХ, Засгийн газрын гишүүн, Батлан хамгаалахын сайд Д.Батлут ажилтан, алба хаагчдад орон сууцны урьдчилгааны батламж гардуулах үеэр хэлсэн үгэндээ ажилтан, алба хаагчид бол тухайн салбарынхаа өнгө төрхийг тодорхойлж, урагш хөдөлгөх, хөгжих хүч болдог. Салбарынхаа ажилтан, алба хаагчдын нийгмийн хамгааллын асуудлуудыг үе шаттайгаар шийдвэрлэж сэтгэл амар, урам зориг дүүрэн үр бүтээлтэй ажиллах боломжийг бүрдүүлэх нь батлан хамгаалах салбарыг хөгжүүлэхэд үнэтэй хувь нэмэр оруулна гэдэгт итгэлтэй байна гэлээ. 

   Батлан хамгаалах яамны зүгээс цаашид ажилтан, алба хаагчдыг орон сууцны ипотекийн зээлд хамруулах, алба хаагчдын гэр бүлээс жижиг, дунд үйлдвэрлэл эрхэлж байгаа болон эрхлэх хүсэлтэй ажилтан, алба хаагчдын ар гэрт тоног төхөөрөмжийн дэмжлэг үзүүлэх, албан тушаалын орон сууцыг барьж байгуулах замаар дээрх асуудлуудыг үе шаттайгаар шийдвэрлэх аж.