Монгол Улс, Бүгд Найрамдах Хятад Ард Улсын Гаалийн байгууллага хоорондын гаалийн зөрчилтэй тэмцэх зөвлөлдөх уулзалтыг 2025 оны 07 дугаар сарын 23-ны өдөр Улаанбаатар хотноо Гаалийн ерөнхий газарт зохион байгууллаа. 

Тус уулзалтаар Монгол Улсын Гаалийн ерөнхий газрын Зөрчилтэй тэмцэх газар болон Бүгд Найрамдах Хятад Ард Улсын Гаалийн ерөнхий газрын Гаалийн цагдаагийн газар хоорондын 2023-2026 онд хамтран ажиллах төлөвлөгөөний хэрэгжилтийн явцыг дүгнэж, Монгол Улс, БНХАУ-ын хилийн боомтод үйлдэгдэж буй хэрэг, зөрчлийн нөхцөл байдлын мэдээллийг солилцож, гаалийн болон бусад холбогдох хууль, тогтоомжийн зөрчилтэй тэмцэх чиглэлээр үр дүнтэй хамтран ажиллах талаар хэлэлцлээ. 

Хамтран ажиллах төлөвлөгөөний хүрээнд улсын хилээр нэвтрүүлэхийг хориглосон, хязгаарласан бараа, мансууруулах эм, сэтгэцэд нөлөөт бодис, буу, сум, галт хэрэгсэл, худалдааны луйвар, зэрлэг ан амьтан тэдгээрийн эд, эрхтний хууль бус эргэлттэй тэмцэхэд онцгойлон анхаарч, зөрчилтэй тэмцэх чиглэл хариуцсан алба хаагчдыг мэргэшүүлэх, чадавхыг бэхжүүлэх чиглэлд хамтарч ажиллахаар тохиролцлоо.