Төв аймгийн Сүмбэр сум нь хуучнаар Түшээт Хан аймгийн Баатарвангийн хошуу, Ардын хувьсгалаас хойш Төв аймгийн Жаргалант сум, САА-н Хар эрэгийн тасгийн суурин дээр БНМАУ-ын АИХ-ын Тэргүүлэгчдийн 1977 оны 3 дугаар сарын 16-ны өдрийн 64 дүгээр зарлигаар Төв аймгийн Сүмбэр сум, Октябрь САА байгуулагдсан. Төв аймгийн хойд хэсэгт: Улаанбаатар хотоос 169 км, аймгийн төвөөс 204км зайд байрладаг. Сэлэнгэ аймгийн Баянгол, Орхон сум болон Төв аймгийн Жаргалант сумтай хиллэдэг. Улаанбаатар - Дарханы төв замаас 11 км, төмөр замаас 18 км зайд оршдог Дархан Сэлэнгийн ЦШС-д холбогдсон төвлөрсөн эрчим хүчтэй зам харилцаа, дэд бүтэц сайтай. Нийт хүн амын 84 хувь нь сумын төвд амьдардаг Одоо тус сум нь Сүмбэр, Жавхлант гэсэн 2 баг, нийт 537 өрх, 1774 хүн амтай. Сүмбэр сум нь Засаг даргын Тамгын газар, Ерөнхий боловсролын сургууль, Сургуулийн өмнөх боловсрол, Эрүүл мэндийн төв, Соёлын төв зэрэг төсвийн байгуулагуудтай Сумын хэмжээгээр нийт 48814 толгой мал тоологдсон. Үүнд: адуу 5593, үхэр 4759, хонь 20776, ямаа 17686. Малчин өрх184, Мал бүхий өрх 115 байна. Нутаг дэвсгэрийн хэмжээ бага, дэд бүтэц сайтай. Улаанбаатар хот, Дархан, Сүхбаатар хотуудыг холбосон төв замд ойр. Газар тариалан, төмс хүнсний ногоо, эрчимжсэн болон өндөр ашиг шимт мал аж ахуй эрхэлдэг.