Монгол Улсын Засгийн газрын 2023 оны 01 дүгээр сарын 05-ний өдрийн 10 дугаартай тогтоолоор Шүүхийн шинжилгээний алба нь “Шүүх шинжилгээний хэлтэс” болж нэршил өөрчлөгдсөн. Монгол Улсын Засгийн газрын 2023 оны 182 дугаар тогтоол, Хууль зүй, дотоод хэргийн сайдын 2023 оны А/274 дүгээр тушаалаар зохион байгуулалтын бүтэц, орон тоог баталсантай холбогдуулан “Дорнод аймаг дахь бүсийн Шүүх шинжилгээний төв” болсон. Криминалистик, шүүх анагаах ухаан, байгалийн ухаан 9 төрлийн шинжилгээг бүсийн хэмжээнд хийж дүгнэлт гарган ажиллаж байна. Шүүх шинжилгээ бол шинжлэх ухаан, технологийн хөгжилд тулгуурлан нийгэмд шударга ёсыг бэхжүүлэх, хүний эрх, эрх чөлөө, хууль ёсны ашиг сонирхлыг хамгаалахын зэрэгцээ аливаа хэрэг, маргааныг хянан шийдвэрлэх ажиллагааны явцад хэрэгт авагдсан ул мөр, эд мөрийн баримтад үзлэг, шинжилгээ хийж, шинжлэх ухааны үндэслэлтэй, хараат бусаар дүгнэлт гаргаж, хэрэг маргааныг шийдвэрлэхэд чухал үүрэг гүйцэтгэдэг салбар болно.