НҮБ-ын Худалдаа хөгжлийн бага хурал (ХХБХ), НҮБ-ын Ази, Номхон далайн эдийн засаг, нийгмийн комисс (АНДЭЗНК), Азийн хөгжлийн банк (АХБ) хамтран “Ази, Номхон Далайн Бүс Нутгийн Худалдааг Хөнгөвчлөх Бага Хурал”-ыг Филиппин Улсын Манила хотноо 2025 оны 03 дугаар сарын 04-05-ны өдрүүдэд амжилттай зохион байгууллаа. Уг арга хэмжээнд бүс нутгийн гишүүн орнуудын худалдааны яам, гаалийн байгууллага, хувийн хэвшил болон улсын байгууллагын 90 гаруй төлөөлөл оролцсон байна.

Хил дамнасан цахим худалдааны хурдацтай өсөлтийг дагаад дэлхий даяар гаалийн байгууллагууд урьд өмнө байгаагүй их хэмжээний жижиг илгээмжийг хүлээн авч, үр ашигтай хяналт, аюулгүй байдал, дагаж мөрдөх журмыг тэнцвэржүүлэх шинэлэг шийдлүүдийг шаардах болсон.

Бага хурлын зочид, төлөөлөгчид Хил дамнасан цахим худалдааны инновацлаг технологийн шийдэл: Хүндрэл ба боломж; Худалдааг хөнгөвчлөх үр дүнтэй хиймэл оюуны шийдэл: Худалдаа ба гаалийн үйлчилгээний ирээдүй; Өгөгдөлд суурилсан Гааль болон Худалдаа: Итгэлцэл, ил тод байдлыг бий болгох” зэрэг 9 агуулгын хүрээнд нийт 22 илтгэл танилцуулж, хэлэлцүүлэг өрнүүлжээ.

Энэхүү арга хэмжээнд Монгол Улсын Гаалийн ерөнхий газрын Эрсдэлийн удирдлагын хэлтсийн дарга Д.Цэндсүрэн зочин илтгэгчээр оролцож Гааль-Бизнесийн түншлэл, түүний дотор Итгэмжлэгдсэн аж ахуйн нэгж хөтөлбөрийн өнөөгийн байдал, цаашид хэрэгжүүлэх арга хэмжээний талаар дэлгэрэнгүй танилцуулсан байна.

Ази, номхон далайн бүс нутгийн худалдааг хөнгөвчлөх бага хуралд мэдээлэл солилцооны хүрээг өргөжүүлэх, цаасгүй харилцаа холбоог дэмжих, төр, хувийн хэвшлийн хамтын ажиллагааг онцоллоо.