Хэрэглэгчийн эрхийг хамгаалах тухай хуулийн шинэчилсэн найруулгын төсөл боловсруулах Улсын Их Хурлын гишүүн Б.Бат-Эрдэнээр ахлуулсан ажлын хэсгээс энэ сарын 19-26-ны өдрүүдэд олон нийтийн хэлэлцүүлэг зохион байгууллаа. Төв, Сэлэнгэ, Дархан-Уул аймаг болон Монголын үндэсний худалдаа аж үйлдвэрийн танхимд зохион байгуулагдсан хэлэлцүүлэгт Монополын эсрэг газраас агентлагийн дарга Б.Билгүүн, Хэрэглэгчийн эрхийг хамгаалах зар сурталчилгааны газрын дарга Ц.Тэрбиш, Хууль эрх зүй, дотоод хяналтын газрын дарга У.Халиунаа нар оролцлоо.

Түлш эрчим хүч, банк санхүү, орон сууц барилга, харилцаа холбоо, эм эмнэлэг болон хүнс худалдаа, хоол үйлдвэрлэл зэрэг салбар бүрээр зохион байгуулагдсан хэлэлцүүлэгт оролцогчид хууль эрх зүйн орчныг хэрхэн сайжруулах талаар санал бодлоо солилцлоо. Монополын эсрэг газрын төлөөлөл Хэрэглэгчийн эрхийг хамгаалах тухай хуулийн төсөлд тусгагдаж буй өөрчлөлт болон оролцогчдын сонирхсон асуултад дэлгэрэнгүй тайлбар мэдээлэл өглөө.