
3. Баянгол дүүргийн Насан туршийн суралцахуйн төвөөс хүүхдийн эрх, хамгааллыг дэмжих, сургуулийн орчин дахь эерэг харилцааг төлөвшүүлэх, үе тэнгийн дээрэлхэлтээс урьдчилан сэргийлэх зорилгоор ерөнхий боловсролын 51 дүгээр сургуулийн бага ангийн 100 сурагчийг хамруулан “Үе тэнгийн дээрэлхэлтээс урьдчилан сэргийлье” сэдэвт сургалт зохион байгууллаа.
Сургалтын хүрээнд үе тэнгийн дээрэлхэлтийн тухай ойлголт, түүний хэлбэрүүд, хүүхдийн сэтгэл зүйд үзүүлэх сөрөг нөлөө, бусдыг ялгаварлан гадуурхахгүй байх, найз нөхдөө хүндэтгэх, эерэг харилцааг эрхэмлэхийн ач холбогдлын талаар насны онцлогт тохирсон мэдлэг, мэдээлэл хүргэлээ.
Түүнчлэн бусдыг шоолох, хочлох, гадуурхах, айлган сүрдүүлэх, санаатайгаар гомдоох зэрэг үйлдэл нь хүүхдийн сэтгэл санаа, өөртөө итгэх итгэл, сурч хөгжих орчинд сөргөөр нөлөөлж болзошгүйг тайлбарлаж, дээрэлхэлт болон найз нөхдийн хоорондын үл ойлголцлын ялгааг ойлгуулахад анхаарав.
Хүүхдүүдэд дээрэлхэлтэд өртсөн болон ийм үйлдлийг харсан тохиолдолд дуугүй өнгөрөөхгүй байх, өөрийн аюулгүй байдлыг хангах, багш, эцэг эх, асран хамгаалагч болон итгэж болох насанд хүрсэн хүнд хандаж тусламж хүсэх нь чухал болохыг онцоллоо.
Мөн найз нөхөдтэйгөө зөв боловсон харилцах, бусдын ялгаатай байдлыг хүндэтгэх, нэгнээ дэмжих, эелдэг үг хэллэг хэрэглэж хэвших нь хүүхэд бүр аюулгүй, ээлтэй орчинд суралцахад чухал үүрэгтэйг сургалтын агуулгаар дамжуулан хүргэв.
Баянгол дүүргийн Насан туршийн суралцахуйн төвөөс хүүхэд бүрийн эрхийг хүндэтгэсэн, аюулгүй, ээлтэй сургалтын орчныг дэмжих, хүүхдийн хувь хүний хөгжил, харилцааны ур чадварыг нэмэгдүүлэхэд чиглэсэн сургалт, нөлөөллийн үйл ажиллагааг зохион байгуулан ажиллаж байна.