
Монголын сэтгүүлчдийн нэгдсэн эвлэлийн болон Монголын зохиолчдын эвлэлийн шагналт сэтгүүлч, яруу найрагч, цаасан урлаач Цээнзэнгийн Галбадрахын уран хайчилбарын "Үзэсгэлэнт Монгол" цомог номын нээлт өнөөдөр Монголын Театрын музейд амжилттай боллоо.
Тэрбээр сэтгүүл зүй, уран зохиолд билэг авьяасаа сорин үгээр урлахын зэрэгцээ урлагийн өвөрмөц нандин төрөл болох цаасан бар буюу уран хайчилбараар Монгол орны үзэсгэлэнт байгаль, ан амьтан, адуу мал, нүүдэлчин ахуй, соёл, уламжлалт зан заншил, эргэх дөрвөн цагт ээлжлэн хувирах эх дэлхийн өнгө аясыг харуулсан дахин давтагдашгүй бүтээлүүдээсээ дээжлэн хүргэж буй юм.
Энэхүү "Үзэсгэлэнт Монгол" шинэ цомог номондоо 30 шахам жил хар цаас, хайчтай нөхөрлөн бүтээсэн хэдэн зуун бүтээлээсээ сорчлон Монголын бүх аймгийн үзэсгэлэнт газар, уул, ус, адуу мал, араатан жигүүртний өвөрмөц шинж байдал, хүн зоны ахуй амьдралыг харуулсан 80 хайчилбарыг багтаажээ.