"Үлэг гүрвэлийн мөрөөр: Говь ба Фүкүй" уриан дор зохион байгуулагдсан семинар нь дэлхийд үлэг гүрвэлийн чулуужсан олдвороороо алдартай Өмнөговь аймаг болон үлэг гүрвэлийг түшиглэсэн орон нутгийн хөгжлийг амжилттай хэрэгжүүлж буй Японы Фүкүй мужийн туршлага, онцлогийг танилцуулахад чиглэгдсэн бөгөөд Япон талаас Фүкүй мужийг хариуцан ажилладаг Жайка Хокүрикү төвийн Такахаши Ёшими, Фүкүй мужийн их сургуулийн Үлэг гүрвэл судлалын тэнхимийн дэд профессор Имай Такуя нар төлөөлөн оролцож, илтгэл тавьлаа. Эхний хэсэгт "Үлэг гүрвэлийн хаант улс Фүкүй мужийн туршлага" сэдвийн хүрээнд Фүкүй мужийн үлэг гүрвэл тулгуурласан орон нутгийн хөгжлийн замнал, олсон амжилт, судалгааны нөөцийг орон нутгийн хөгжилд ашиглах арга зам, мөн үлэг гүрвэлийн нөөцөд суурилсан бүтээгдэхүүн хөгжүүлэлт, орон нутгийн эдийн засгийг дэмжих талаар илтгэл танилцууллаа.

Хоёрдугаар хэсэгт "Өмнөговь аймагт үлэг гүрвэлд тулгуурласан аялал жуулчлалыг хөгжүүлэх нь" сэдвээр аймаг дахь үлэг гүрвэлийн нөөцийн ашиглалтын өнөөгийн байдал, тулгамдаж буй асуудлыг танилцуулж, Өмнөговь аймаг, Фүкүй мужийн төлөөлөл харилцан санал солилцлоо. Семинарт Өмнөговь аймгийн аялал жуулчлалын салбарын бизнес эрхлэгчид, Уламжлалт гар урлалын холбооны төлөөлөл оролцсон нь онцлог боллоо. Мөн бэлэг дурсгалын зүйл үйлдвэрлэгчид, тус үйлдвэрлэлийг хийхийг зорьж буй иргэд, гар урчууд оролцож, үлэг гүрвэлийн нөөцийг аялал жуулчлал, үйлдвэрлэл, бүс нутгийн брэнд бүтээгдэхүүнтэй хэрхэн уялдуулах боломжийг хамтдаа эрэлхийллээ. Үлэг гүрвэлийн нөөц нь Өмнөговь аймгийн аялал жуулчлал, орон нутгийн үйлдвэрлэл, брэнд бүтээгдэхүүнийг хөгжүүлэх үндсэн суурь бөгөөд Фүкүй мужийн туршлагаас суралцах, бизнес эрхлэгчдийн оролцоог нэмэгдүүлэх нь орон нутгийн хөгжилд чухал ач холбогдолтой билээ.