АНУ-ын Өмнөд Каролина мужийн Ричленд, Лексингтон, Фэйрфилд тойргуудад үйл ажиллагаа явуулдаг Midlands Technical College (MTC)-д Монгол Улсын Боловсролын яамны төлөөлөл зочиллоо.
Тус коллеж нь олон нийтийн статустай, Мэргэжлийн болон техникийн боловсролыг сонгосон залуусыг бэлтгэхдээ орон нутгийнхаа хөгжилд хувь нэмэр оруулахад илүү анхаарч, амжилт үзүүлэхүйц суралцах орчныг бүрдүүлж, тэднийг карьераа зөв сонгох, амьдралын зорилгоо тодорхойлоход нь бүх талаар дэмжлэг үзүүлдэг.
Чанартай сургалтыг хүртээмжтэй байдлаар хүргэх, цаг үеийн шаардлагад нийцүүлэн сургалтын арга барилыг шинэчлэх, сургуулийн гишүүн бүр харилцан бие биесээ хүндэтгэсэн, шударга, ёс зүйтэй байх орчныг бүрдүүлэхэд анхаардаг байна.
Мөн бизнес, боловсрол, төрийн байгууллагуудтай хамтран ажиллах, арьсны өнгө, нийгмийн гарал үүсэл үл хамааран хүн бүрд тэгш боломж олгож, олон талт байдлыг эрхэмлэх зэрэг үндсэн зарчимтай.
Их сургуультай харьцуулахад сургалтын төлбөр хямд, төгссөний дараа их сургууль руу шилжин үргэлжлүүлэн суралцах боломжтой нь давуу тал болдог.
Богино хугацааны сургалт, мэргэжлийн гэрчилгээ олгох хөтөлбөрүүд нь төгсмөгцөө шууд ажлын байртай болоход хамгийн дөхөм болдгийг онцоллоо. Оюутнууд өөрийн амьдралын хэмнэлд тааруулан бүтэн болон хагас цагаар, танхимаар болон цахимаар суралцах өргөн боломжтой.
Тус коллеж нь урлаг, шинжлэх ухаан, бизнес, инженерчлэлийн технологи, эрүүл мэнд, сувилахуй, мэдээллийн технологи зэрэг олон салбарт дэc эрдмийн зэрэг (Associate Degree), диплом болон сертификат олгодог.
Зөвхөн анхан шатны оюутнууд бус, насанд хүрэгчид болон албан хаагчдад мэргэжлээ дээшлүүлэх, шинэ ур чадвар эзэмших боломжийг олгодог тусгай хөтөлбөрүүдийг хэрэгжүүлдэг байна.
Мөн орчин үеийн тоног төхөөрөмжөөр тоноглогдсон сургалтын төвүүд болон үйлдвэрлэгчид, бизнес эрхлэгчидтэй хамтарсан хөтөлбөрүүдээр дамжуулан бодит ажлын туршлага хуримтлуулах боломжийг олгодог ажээ.
