Өмнөговь аймгийн нийгэм, эдийн засгийн хөгжил, дэд бүтцийн хүртээмжийг нэмэгдүүлэх, иргэдийн амьдрах орчин, үйлчилгээний чанарыг сайжруулах зорилгоор “Говийн оюу хөгжлийг дэмжих сан”-гийн санхүүжилтээр хэрэгжүүлэх хөрөнгө оруулалт, бүтээн байгуулалтын төслүүдийг эрэмбэлэн боловсруулж, сангийн Удирдах зөвлөлийн хурлаар хэлэлцэн шийдвэрлэдэг.

Энэ удаагийн Удирдах зөвлөлийн хурлаар Өмнөговь аймагт дараах төсөл, арга хэмжээнд санхүүжилт олгохоор баталлаа.

Тухайлбал, орон нутгийн дэд бүтцийн хүчин чадал, хүртээмжийг нэмэгдүүлэх чиглэлээр дараах ажлуудыг санхүүжүүлэхээр шийдвэрлэв. Үүнд:

• Өмнөговь аймгийн “Гурвансайхан” нисэх буудлыг олон улсын нислэг хүлээн авах боломжтой болгох өргөтгөл, шинэчлэлийн ажилд 8.4 тэрбум төгрөгийн санхүүжилт төлөвлөснөөс 2026 онд 1.9 тэрбум төгрөг;

• Дулааны цахилгаан станцын 3 дугаар зуух буюу SHX-25-2 5/400-1 маркийн зуухны их засварт 833.7 сая төгрөг;

• Дулааны цахилгаан станцын ДДТ-4-ийн засвар, өргөтгөлд 248.5 сая төгрөг;

• Дулааны цахилгаан станц болон Дулаан хангамжийн газрын шугам сүлжээний тохируулгын ажилд 195 сая төгрөг;

• Ханбогд сумын ерөнхий боловсролын сургуулийн багш, ажилчдын 60 айлын орон сууцны гадна инженерийн шугам сүлжээний ажилд 1.49 тэрбум төгрөг тус тус зарцуулна.

Мөн Даланзадгад суманд шинээр баригдах сургууль, цэцэрлэг болон одоо ашиглагдаж буй цэцэрлэгүүдийн засвар, хүчитгэлийн зураг төсөл боловсруулах, Манлай сумын цэвэрлэх байгууламж, авто замын зураг төсөл боловсруулах зэрэг дэд бүтцийн ажлуудыг хэрэгжүүлнэ.

Үүнээс гадна боловсролын орчин, хүүхдийн сурч боловсрох нөхцөл болон иргэдийн аюулгүй байдлыг сайжруулахад чиглэсэн дараах ажлуудыг санхүүжүүлэхээр баталлаа. Үүнд:

• Даланзадгад сумын 1 дүгээр сургуулийн орон нутгийн төсвийн хөрөнгө оруулалтаар баригдаж буй сургуулийн гал тогоонд шаардлагатай тоног төхөөрөмж худалдан авахад 332 сая төгрөг;

• Баяндалай сумын ерөнхий боловсролын сургуулийн гадна засвар, тохижилтын ажилд 981.8 сая төгрөг;

• Даланзадгад суманд гэрлэн дохио угсрах ажилд 247.4 сая төгрөг тус тус зарцуулна.

Эдгээр хөрөнгө оруулалт, бүтээн байгуулалтын ажлууд хэрэгжсэнээр аймгийн эрчим хүч, дулаан хангамж, нисэх буудал, инженерийн дэд бүтцийн хүчин чадал нэмэгдэж, боловсролын байгууллагын орчин, хүүхдийн сурч хөгжих нөхцөл болон замын хөдөлгөөний аюулгүй байдал сайжрах юм.