“ӨСӨЛТТЭЙ ӨМНӨГОВЬ – ХАРИУЦЛАГАТАЙ УУЛ УУРХАЙ, БАЙГАЛЬ ОРЧИН ЦОГЦ СУРГАЛТ” ЗОХИОН БАЙГУУЛАГДАЖ БАЙНА
Өмнөговь аймаг нь уул уурхайн олборлолт, үйлдвэрлэл эрчимтэй хөгжиж буй бүс нутаг. Ашиглалтын тусгай зөвшөөрөлтэй үйл ажиллагаа явуулж буй 20 уул уурхайн компанитай. Уул уурхайн салбарын хөгжил нь орон нутгийн эдийн засаг, нийгмийн хөгжилд хувь нэмэр оруулж байгаа хэдий ч байгаль орчин, газрын доройтол, цөлжилт, усны нөөцийг хамгаалах асуудалд анхаарах шаардлагатай.
Энэ хүрээнд уул уурхайн салбарын хариуцлагатай үйл ажиллагааг төлөвшүүлэх, байгаль орчны хамгаалал, нөхөн сэргээлтийн талаарх мэдлэг, ойлголтыг нэмэгдүүлэх зорилгоор “Өсөлттэй Өмнөговь – Хариуцлагатай уул уурхай, байгаль орчин цогц сургалт” зохион байгуулагдаж байна.
Сургалтаар уул уурхайн хууль тогтоомжийн хэрэгжилт, уурхайн хаалт, нөхөн сэргээлт, байгаль орчны ерөнхий үнэлгээний журам, хог хаягдлын менежмент, говийн бүсийн хөрсний доройтол, уул уурхайн үйл ажиллагааны амьтны аймагт үзүүлэх нөлөөллийн мониторинг, хуурай бүс нутгийн усны менежмент зэрэг асуудлыг хэлэлцэж байна.
Мөн олон улсын стандартыг Монголын уул уурхайн салбарт нутагшуулах боломж, хөрсний шинжилгээ, бордооны төрөл, норм, тунг тооцоолох арга зүй зэрэг сэдвээр эрдэмтэн, доктор, профессор, судлаачид мэдлэг, туршлагаа хуваалцах юм.
