БАЯНЗАГ ДЭЛХИЙН ТОГТВОРТОЙ АЯЛАЛ ЖУУЛЧЛАЛЫН ШИЛДЭГ 100 ТУРШЛАГАД БАГТЛАА
Словени Улсын Крань хотноо зохион байгуулагдсан “Green Destinations Top 100 Stories 2026” олон улсын шалгаруулалтаар Өмнөговь аймгийн Булган сумын нутагт орших Баянзаг – Flaming Cliffs болон тахь адууг эх нутагт нь сэргээн нутагшуулж буй Хустайн нурууны байгалийн цогцолборт газар дэлхийн тогтвортой аялал жуулчлалын “Шилдэг 100 туршлага”-д шалгарлаа. Ингэснээр Монгол Улсаас анх удаа тус жагсаалтад багтаж, байгаль, түүх, соёлын өвд түшиглэсэн аялал жуулчлалын үнэ цэнийг олон улсад ийнхүү таниуллаа.
2014 оноос хэрэгжиж эхэлсэн “Green Destinations Top 100 Stories” санаачилга нь тогтвортой аялал жуулчлалыг хөгжүүлж буй улс орон, бүс нутгийн сайн туршлагыг олон улсад сурталчлах зорилготой. Энэ жилийн шалгаруулалтад дэлхийн 100 гаруй улсын аялал жуулчлалын зорин очих газруудаас ирүүлсэн 660 гаруй сайн туршлагыг танилцуулсан байна.
Баянзаг нь үлэг гүрвэлийн чулуужсан олдвор, өвөрмөц тогтоц бүхий улаан эрэг, говийн байгалийн үзэсгэлэнгээрээ дэлхийд танигдсан Монголын аялал жуулчлалын онцлох бүс нутгийн нэг юм. Жил бүр 30,000 гаруй жуулчин зорин ирдэг Өмнөговь аймгийн аялал жуулчлалын гол түшиц газрын нэг төдийгүй Монголын байгалийн болон палеонтологийн өвийг дэлхийд таниулах үзэсгэлэнт газар юм.
Өмнөговь аймаг аялал жуулчлалыг эдийн засгийн тэргүүлэх салбарын нэг болгон хөгжүүлж, байгалийн болон түүх, соёлын өвийг хамгаалах, байгальд ээлтэй аялал жуулчлалыг дэмжих, орон нутгийн онцлогт тулгуурласан тогтвортой хөгжлийг бий болгох бодлого баримталж байна. Энэ хүрээнд аялал жуулчлалын гол бүсүүдийн менежментийг сайжруулах, дэд бүтэц, үйлчилгээний чанар, хүртээмжийг нэмэгдүүлэх, байгалийн өвийг хамгаалах чиглэлээр үе шаттай ажиллаж байна.
