МАНЛАЙ СУМЫН ШИНЭ ДОТУУР БАЙР СУРАГЧДЫН АМЬДРАХ, СУРАЛЦАХ ТААТАЙ ОРЧНЫГ БҮРЭН БҮРДҮҮЛЭЭД БАЙНА
Өмнөговь аймгийн Манлай суманд орон нутгийн төсвийн хөрөнгөөр шинээр барьсан дотуур байр ашиглалтад орж, сурагчдын амьдрах, суралцах ая тухтай орчныг бүрэн бүрдүүлжээ.
Тус дотуур байранд малчин өрхийн 53 хүүхэд амьдарч, суралцаж байна. Шинэ барилгыг орчин үеийн интерьер дизайны шийдлээр тохижуулж, сурагчдын өдөр тутмын хэрэгцээнд нийцсэн ариун цэврийн өрөө, шүршүүр, автомат угаалгын машин бүхий угаалгын хэсэг, хичээл давтах номын сан, амрах өрөө, цайны өрөө зэргийг шийдсэнээр хүүхдүүдийн сурч хөгжих, амьдрах таатай нөхцөлийг бүрдүүлсэн байна.
Аймгийн Засаг дарга Н.Энхбат Манлай суманд ажиллах үеэрээ дотуур байрны сурагчидтай уулзаж, тэдний амьдрах орчин, хоолны чанар, хичээллэх болон хөгжих орчны хүртээмжийн талаар санал бодлыг нь сонсож, мэдээлэл авлаа.
Хүүхдийн эрүүл аюулгүй таатай амьдрах нөхцөл бүрдсэнээр дотуур байранд амьдрах хүүхдийн тоо нэмэгдэж байгааг сургуулийн удирдлагууд онцоллоо.
