"Ахлагчийн албаны тэмдэглэлт өдөр"-т зориулсан баярын хуралд аймаг, орон нутгийн удирдлагууд, Зуунмод цэргийн хотхоны төрийн цэргийн болон хууль сахиулах байгууллагуудын захирагч, дарга нар хүндэт зочноор уригдан оролцлоо.
Хурлын үйл ажиллагааг нээж, нийт ахлагчийн бүрэлдэхүүнд Зэвсэгт хүчний Хуурай замын цэргийн командлагч, Хошууч генерал Ч.Цогтжаргал, аймгийн Засаг дарга Л.Төмөрчөдөр нар баяр хүргэж үг хэллээ.
Баярын хурлын индрээс аймгийн Засаг дарга Л.Төмөрчөдөр хэлсэн үгэндээ: “Зуунмод цэргийн хотхоны нийт ахлагчийн бүрэлдэхүүн маань ийнхүү нэгдэн нягтарч, ажлын туршлагаа солилцон хамтын ажиллагаагаа бэхжүүлж байгаа нь тун сайшаалтай байна.
Цэргийн хүрээний ахлагчийн зөвлөл маань энэхүү тэмдэглэлт өдрөө тохиолдуулан шинээр эмхлэн зохион байгуулагдсан нь цаашид нийт ахлагч нарынхаа нийгмийн асуудал болон аймаг орон нутгийн хөгжил, дэвшилд хувь нэмрээ оруулан идэвх, зүтгэлтэй ажиллах болно гэдэгт итгэлтэй байна.
Аймаг орон нутгийн удирдлагын зүгээс ахлагчийн албаны хөгжил, бие бүрэлдэхүүний нийгмийн асуудлыг хууль эрх зүйн хүрээнд нөөц боломждоо тулгуурлан бэхжүүлж ажиллах нь тухайн салбарын болоод орон нутгийн удирдлага, цаашлаад төр засгийн анхаарлын төвд байх ёстой зүйл юм" хэмээн онцлоод аймгийн Засаг даргын зөвлөл, Засаг даргын Тамгын газраас ахлагчийн зөвлөлийнхөө хүсэлтийн дагуу аймгийн нутаг дэвсгэрт үйл ажиллагаа явуулдаг Зэвсэгт хүчний 334 дүгээр ангийн Хамгаалалтын тоотын буудагч, ахлагч Б.Дамбийд байрны урьдчилгаа 30 сая төгрөгийг олгохоор шийдвэрлэснийг дуулгалаа.
Мөн ажил үйлсээрээ хамт олноо манлайлж ажилласан зарим ахлагч нарыг аймаг, орон нутгийн шагналаар шагнаж урамшууллаа.
