НҮБ-ын Зэвсэг хураах асуудал эрхэлсэн алба, АНУ-ын Төрийн Департаментын Экспортын хяналт, хилийн аюулгүй байдлын хөтөлбөр, Европын аюулгүй байдал, хамтын ажиллагааны байгууллага, ХБНГУ-ын Эдийн засаг, экспортын хяналтын алба, Монгол Улсын Терроризмтой тэмцэх зөвлөл, Гаалийн ерөнхий газар хамтран алба хаагчдын чадавхыг бэхжүүлэх, сургаж мэргэшүүлэх чиглэлээр “Хоёрдмол болон цэргийн зориулалттай барааг таньж илрүүлэх нь” сэдэвт ахисан шатны сургалт, мэдээллийн олон улсын арга хэмжээг энэ сарын 3-4-ний өдрүүдэд зохион байгууллаа.
Тус сургалт нь экспортын хяналтын тогтолцоог бэхжүүлэх, стратегийн болон цэргийн зориулалттай зарим төрлийн барааны хууль бус тээвэрлэлтийг таслан зогсооход чиглэсэн мэдлэг, ур чадварыг дээшлүүлэх зорилготой юм.
Энэхүү арга хэмжээг ГЕГ-ын дарга П.Дэлгэрнаран албан ёсоор нээж, хэлсэн үгэндээ “ Гаалийн байгууллага стратегийн худалдааны хяналтыг хэрэгжүүлэх, эрсдэлтэй барааг цаг тухайд нь илрүүлэх, хууль бус шилжүүлэг, зөрчлөөс урьдчилан сэргийлэхэд чухал үүрэгтэй. Энэ нь зөвхөн хууль сахиулах асуудал бус, олон улсын аюулгүй байдлыг хангах, Монгол Улсын олон улсын өмнө хүлээсэн үүргээ хэрэгжүүлэх, хариуцлагатай худалдааг дэмжихтэй салшгүй холбоотой юм.
Иймд сургалтаар олж авсан мэдлэгээ зөвхөн онолын түвшинд бус, бараа техникийн дүн шинжилгээ хийх, эрслэлийн шинж тэмдэгийг таних, сэжигтэй тохиолдолыг зөв үнэлэх арга барилыг эзэмшиж, практик чадвараа хөгжүүлэхэд анхаарах нь чухал байна” гэв.
Олон улсын худалдаанд ашиглагдаж байгаа бараа, тоног төхөөрөмж, технологи нь энгийн үйлдвэрлэл, шинжлэх ухаан, эрүүл мэнд, харилцаа холбооны зориулалтаар ашиглагдахын зэрэгцээ, цэргийн болон үй олноор хөнөөх зэвсэг бүтээх, үйлдвэрлэхэд ашиглагдах эрсдэлтэй байдаг. Иймээс тухайн барааны зөвхөн нэр, зориулалтаар хязгаарлахгүйгээр техникийн үзүүлэлт, ашиглах боломж, эцсийн хэрэглэгч, ашиглалт болон тээвэрлэлтийн нөхцөлийг цогцоор нь үнэлэх шаардлагатай байгааг сургалтад оролцогчид онцолж байлаа.
