Хөдөлмөрийн аюулгүй байдал, эрүүл мэндийн төвөөс нийслэлийн 9 дүүрэг, 21 аймгийн Хөдөлмөр, халамжийн үйлчилгээний газар, хэлтэс, аймаг, сумдын холбогдох мэргэжилтнүүдэд хөдөлмөрийн аюулгүй байдал, эрүүл мэндийн цахим сургалтыг энэ оны 11-р сарын 5, 6-ны өдрүүдэд зохион байгууллаа.
Сургалтад баруун, төв, зүүн бүсийн холбогдох 230 гаруй мэргэжилтэн хамрагдаж, хөдөлмөрийн аюулгүй байдал, эрүүл мэндийн хууль тогтоомж, ажлын байрны эрсдэлийг илрүүлэх, үнэлэх, бууруулах, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх чиглэлээр мэдлэг, мэдээлэл авлаа.
Мөн байгууллагын ХАБЭМ-ийн үйл ажиллагааны зохион байгуулалт, хөдөлмөрийн эрүүл мэндийн тандалт, ажлын байрны хөдөлмөрийн нөхцөлийн үнэлгээ, эрүүл мэндийн үзлэг болон нийгмийн даатгалын багц хуулийн нэмэлт, өөрчлөлтийн талаар сургалт явуулсан юм.
Энэхүү сургалт нь орон нутгийн мэргэжилтнүүдийн мэдлэг, практик ур чадварыг дээшлүүлэх, ажил олгогч, ажилтнуудад мэргэжил, арга зүйн зөвлөгөө, мэдээлэл хүргэх чадавхыг бэхжүүлэх, орон нутаг дахь урьдчилан сэргийлэх үйл ажиллагааны уялдаа холбоог сайжруулах зорилготой юм.
