📍Шүтээн зураач, лам Т.Дүгэрийн “Жийдаан богдын увдис” хэмээх шүтээн үзэсгэлэн, “Монголын сонгодог орчуулгын уран зохиолын эрт ба эдүгээг холбосон нэгэн гайхамшигт бүтээл” зурагт номын үзэсгэлэнг Г.Занабазарын нэрэмжит Дүрслэх урлагийн музей үзэсгэлэнгийн танхимд анх удаагаа энэ сарын 8-12-ны өдрүүдэд олны хүртээл болж байна. Жийдаан буюу Жигүн хэмээх энэ хүн бол Монголын эзэнт Юан гүрэн тогтох үед зах залгаа оршиж байсан Өмнөд Сүн улсын үед амьдарч байсан бодит хүн юм. Тухайн цагт Хятадын Күнзийн суртал болоод Бомбын ёс нь Хятадын оюун санааны гол эх ундарга, аврагч нь хэмээн үзэж байсан итгэл нуран унасан, дайн тулаан, гунигт цаг үед амьдарч байжээ. Монгол, Энэтхэг, Төвөдийн олон хутагт, хувилгаадын хойт төрөл нь тодрон мэндэлсэн бол, Хятадад цорын ганц Жийдаан богд л мэндэлжээ. Түүгээр үл барам хятадын уламжлалт шашин, соёл ахуй, хэвшмэл үхширмэл ёс заншлыг шүүмжилж, хүний санаа саванд багтахгүй шид үзүүлсээр байснаараа машид их алдаршжээ.
Эдүгээ цагт “Жийдаан богдын намтар” нь Говийн Ноён Хутагтын музейн үзүүллэгийн танхим болон сан хөмрөгт “Ше Цан Хуй түүхийн тэргүүн дэвтэр”-ээс эхлэн 21 улаан хавтас бүхий монгол бичгээр /ДРМ-2012.52.1/ үзмэрийн бүртгэлтэйгээр хадгалагдаж байна. Монгол оронд яагаад ингэж ихэд дэлгэрэх болов гэвэл, Ноён хутагт Данзанравжаа болоод VIII Богд хоёр ”жилийн засал ном” хийлгэхдээ “Жийдаан богдын намтар”-ыг уншуулж, эмгэнэлт инээдэмт түүхийг нь уншуулдаг байжээ. Өнөө ч хүртэл шашны зүтгэлтэн гэж үздэг учраас ингэж зургаар бүтээсэн нь нэн ховор. Тиймийн тул шүтээн зураач Т.Дүгэрийн энэхүү зурагт шүтээн үзэсгэлэн, зурагт ном үзэгчдийн хүртээл болж байна.
📍Г.Занабазарын нэрэмжит Дүрслэх Урлагийн Музейн үзэсгэлэнгийн танхимд
⏳ 2026.11.08-ны өдрөөс 11-р сарын 12-ны өдөр хүртэл
⏰ Даваа-Баасан 09:00-17:00, Бямба-Ням 10:00-17:00 ⏳
