Монгол Улсын Ерөнхий сайд, Засгийн газраас дэвшүүлсэн “Чөлөөлье” үндэсний санаачилга, зөвшөөрлийн тогтолцооны шинэчлэлийн хүрээнд төрийн албан хаагчдыг чадавхжуулах, зөвшөөрөл, мэдэгдлийн үйл ажиллагааг хялбаршуулах, хууль тогтоомжийн хэрэгжилтийг хангах, бизнес эрхлэгчдэд ээлтэй орчныг бүрдүүлэх зорилготой “Хууль зүйн салбарын зөвшөөрлийн эрх зүйн зохицуулалт, хэрэгжилт ба бизнесийн орчин” арга хэмжээ 2026 оны 11 дүгээр сарын 02–03-ны өдрүүдэд зохион байгуулагдаж байна.

Засгийн газрын XI байрны нэгдүгээр давхарт байрлах Зөвшөөрлийн мэдээлэл, үйлчилгээний нэгдсэн төвд болж буй тус арга хэмжээнд Хууль зүй, дотоод хэргийн яам, Эдийн засаг, хөгжлийн яам болон харьяа агентлагуудын төлөөлөл оролцож, зөвшөөрлийн тогтолцооны шинэчлэл, хууль тогтоомжийн хэрэгжилт, төрийн үйлчилгээний цахимжилт, тулгамдаж буй асуудлаар илтгэл, мэдээлэл танилцуулж байна.

Арга хэмжээний эхний өдөр зөвшөөрөл, мэдэгдлийн тухай хуулийн гол өөрчлөлт, хэрэгжилт, зөвшөөрөл шийдвэрлэлтийн үйл ажиллагаанд хийсэн хяналт шалгалт, дүн шинжилгээ, зөвшөөрөл олгох, сунгах, түдгэлзүүлэх, сэргээх, хүчингүй болгохтой холбоотой эрх зүйн зохицуулалтыг хэлэлцсэн юм.

Өнөөдөр буюу 11 дүгээр сарын 03-ны өдрийн арга хэмжээг Эдийн засаг, хөгжлийн яамны Хяналт, шинжилгээ, үнэлгээ, дотоод аудитын газрын дарга Г.Оюун-Эрдэнэ, Хууль зүй, дотоод хэргийн яамны Хяналт шалгалт, дотоод аудитын газрын дарга А.Энх-Эрдэнэ нарын нээлтийн үгээр эхлүүллээ.

Үүний дараа хөтөлбөрийн дагуу Улсын бүртгэлийн ерөнхий газрын Хуулийн этгээдийн улсын бүртгэлийн газрын дарга Ж.Аюуш “Улсын бүртгэлийн байгууллагаас үзүүлэх төрийн үйлчилгээ, цахимжилт, анхаарах асуудал” сэдвээр илтгэл тавьж, улсын бүртгэлийн байгууллагын үйл ажиллагаа, цахим үйлчилгээний шинэчлэл болон цаашид анхаарах асуудлын талаар танилцууллаа.

Тэрээр улсын бүртгэлийн байгууллага иргэн, эд хөрөнгө, хуулийн этгээдийн улсын бүртгэлийн үндсэн гурван чиглэлээр үйл ажиллагаа явуулж, 3.6 сая иргэн, 1.4 сая эд хөрөнгө, 272,421 хуулийн этгээдийн бүртгэлийн мэдээллийг хариуцан ажиллаж байгааг дурдав. Мөн E-Mongolia, E-Business системээр дамжуулан улсын бүртгэлийн 120 гаруй төрлийн үйлчилгээ, лавлагааг цахимаар хүргэж байгаа бөгөөд цахим сувгаар нийт 305,407 үйлчилгээ үзүүлсний 240,150 нь үйлчилгээ, 65,257 нь лавлагаа байгааг онцоллоо.

Мөн хуулийн этгээдийн бүртгэлийн үйлчилгээг хялбаршуулах хүрээнд нэрийн давхардал, ижил төстэй байдлыг хиймэл оюун ухаан (AI) ашиглан шалгах, шинээр байгуулах хуулийн этгээдийн баримт бичгийг тоон гарын үсгээр баталгаажуулан цахимаар илгээх, тамга, тэмдгийн хяналтын дугаарыг цахимаар олгох зэрэг шинэчлэлийг хэрэгжүүлж, цаашид бусад төрийн байгууллагатай мэдээлэл солилцох замаар төр өөрт байгаа мэдээллээ иргэн, хуулийн этгээдээс шаардахгүй байх зарчмыг баримталж, улсын бүртгэл хөтлөхдөө төрөлжсөн мэдээллийн сангаас мэдээлэл, баримт бичгийг бүрдүүлэх боломжтой байдлаар системийн хөгжүүлэлтийг хийж байгааг танилцууллаа.

Хөтөлбөрийн дагуу Хил хамгаалах байгууллага, Гадаадын иргэн, харьяатын газар, Архивын ерөнхий газраас үзүүлж буй төрийн үйлчилгээ, цахимжилт, анхаарах асуудлаар холбогдох албан тушаалтнууд илтгэл, мэдээлэл танилцуулж, оролцогчдын асуултад хариулан ажиллаж байна.

Түүнчлэн арга хэмжээний хүрээнд хууль зүйн салбарын төрийн байгууллагуудаас олгох зөвшөөрөл, лавлагаа, тодорхойлолт болон бусад үйлчилгээний талаар иргэн, хуулийн этгээдэд зөвлөгөө, мэдээлэл өгөхөөс гадна Чингэлтэй дүүргийн Улсын бүртгэлийн хэлтэс иргэн, эд хөрөнгө, хуулийн этгээдийн улсын бүртгэлийн үйлчилгээг үзүүлж байна.