Хөдөлмөрийн аюулгүй байдал, эрүүл мэндийн төв, Нийгмийн даатгалын ерөнхий газар хамтран өнөөдөр буюу 10-р сарын 30-ны өдөр “Хөдөлмөрийн аюулгүй байдал, эрүүл мэндийн эрдэм шинжилгээний чуулган–2026”-ыг зохион байгуулж байна.

Тус чуулганд ирүүлсэн нийт 34 илтгэлээс шалгарсан 20 илтгэлийг аман болон ханан хэлбэрээр хэлэлцүүлж байгаа бөгөөд үүнээс 9 нь аман, 11 нь ханан илтгэл юм.

Аман илтгэлийг чиглэлээр нь ангилбал хөдөлмөрийн аюулгүй байдлын чиглэлээр 3, хөдөлмөрийн эрүүл ахуйн чиглэлээр 3, хөдөлмөрийн анагаах ухааны чиглэлээр 3 илтгэл байна.

Харин ханан илтгэлийн хувьд хөдөлмөрийн аюулгүй байдлын чиглэлээр 6, хөдөлмөрийн эрүүл ахуйн 2, хөдөлмөрийн анагаах ухааны чиглэлээр 3 илтгэл тус тус хэлэлцүүлж байна.

Чуулганы төгсгөлд аман болон ханан илтгэлийн төрөл тус бүрээс шилдэг гурван илтгэлийг шалгаруулна.

Тус чуулган нь хөдөлмөрийн аюулгүй байдал, эрүүл мэндийн салбарын эрдэм шинжилгээ, шинэлэг арга барил, байгууллагын сайн туршлагыг танилцуулах, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, судалгааны үр дүнг хэлэлцэх юм.

Энэ удаагийн чуулганд илтгэлээ ирүүлсэн оролцогчид болон төрийн болон төрийн бус байгууллага, мэргэжлийн нийгэмлэг, холбоодын төлөөлөл, эрдэмтэн судлаач, салбарын мэргэжилтнүүд зэрэг 100 гаруй зочин, төлөөлөгч оролцож, мэдлэг, туршлагаа хуваалцан салбарт тулгамдаж буй асуудал болон цаашдын судалгааны хэрэгцээ, хамтын ажиллагааны боломжийн талаар санал солилцож байна.

Чуулганы үр дүнд эрдэм шинжилгээний илтгэлийн эмхэтгэл гаргаж, судалгааны үр дүн, шинэлэг арга, сайн туршлагыг нэгтгэн түгээхээс гадна цаашдын судалгаа, хамтын ажиллагааны чиглэл, хэрэгжүүлэх санал зөвлөмжийг тайланд тусгана.

Ингэснээр судалгаанд суурилсан шийдлийг хөдөлмөрийн аюулгүй байдал, эрүүл мэндийн салбарын практикт нэвтрүүлэх, байгууллагуудын харилцан суралцах боломжийг нэмэгдүүлэх чухал ач холбогдолтой юм.