✅Соёл, спорт, аялал жуулчлал, залуучуудын яамны Соёл, урлагийн бодлого, зохицуулалтын газрын дарга Д.Наранцэцэг, Засгийн газрын хэрэгжүүлэгч агентлаг Соёл, урлагийн газрын дарга Г.Батхуяг нар нийслэлийн Сонгинохайрхан дүүрэгт байрлах Хүүхэд, залуучуудын театрт ажиллаж, байгууллагын үйл ажиллагаа, уран бүтээлийн бодлого, өнөөгийн нөхцөл байдал, цаашдын хөгжлийн зорилттой танилцлаа.

✅Ажлын уулзалтын үеэр театрын захирал Н.Ариунболд байгууллагын үйл ажиллагааны үндсэн чиглэл, бүтэц, зохион байгуулалт, хүний нөөц, уран бүтээлийн бодлого, хэрэгжүүлж буй төсөл, хөтөлбөр, цаашид хэрэгжүүлэхээр төлөвлөсөн ажлуудын талаар танилцуулж, тулгамдаж буй асуудал, шийдвэрлэх шаардлагатай асуудлуудаа танилцууллаа.

🔖Нийслэлийн хамгийн их хүн ам төвлөрсөн Сонгинохайрхан дүүргийн 330 мянган иргэн төдийгүй нийт улсын хүүхэд, залуучуудын оюуны хөгжлийг дэмжих, гоо зүйн боловсрол олгох нөхцөл бүрдүүлсэн тус театр нь 2024 онд олон улсын стандартад нийцсэн, 850 хүний суудалтай шинэ барилгаа ашиглалтад оруулснаар үйл ажиллагаагаа өргөжүүлж, хүүхэд, өсвөр үе, залуучуудад зориулсан урлаг, соёлын үйлчилгээг чанартай, хүртээмжтэй хүргэх шинэ боломж бүрдсэн юм.

🔖Тус театр нь хүүхэд, залуучуудын урлагийн боловсролыг дэмжих, гоо зүйн мэдрэмж, бүтээлч сэтгэлгээ, танин мэдэхүйг хөгжүүлэх, үндэсний түүх, соёл, уламжлал, үнэт зүйлсийг урлагаар дамжуулан түгээн дэлгэрүүлэх үндсэн зорилгын хүрээнд үйл ажиллагаагаа явуулж байна