@Дундговь аймгийн ЗДТГ-ын Цэргийн штаб
“Хөдөөгийн сэргэлт – Шинэ Дундговь”, “Хүн төвтэй хөгжил – Шинэчлэлийн жил”-ийн хүрээнд үндэсний сөрөн тэсвэрлэх чадавхыг нэмэгдүүлэх, батлан хамгаалах бодлого, хууль тогтоомжийг орон нутагт хэрэгжүүлэх, нутгийн захиргааны байгууллагын үүрэг, оролцоог бэхжүүлэх зорилгоор Дундговь аймгийн сумдын Засаг дарга нарт зориулсан “Цэргийн бэлтгэл” сургалтыг хоёр өдрийн хугацаанд зохион байгууллаа.
Монгол Улсын Батлан хамгаалахын сайдын 2026 оны 10 дугаар сарын 14-ний өдрийн А/421 дүгээр тушаалын хэрэгжилтийг хангах, “Эх оронч Монгол” үндэсний хөдөлгөөний хүрээнд зохион байгуулсан тус сургалтад аймгийн 15 сумын Засаг дарга бүрэн хамрагдав.
Сургалт онолын болон хээрийн дадлага гэсэн үндсэн чиглэлээр явагдаж, оролцогчдод батлан хамгаалах бодлого, Зэвсэгт хүчний үйл ажиллагаа, холбогдох хууль тогтоомжийг орон нутагт хэрэгжүүлэхэд нутгийн захиргааны байгууллагын гүйцэтгэх үүрэг, оролцооны талаар мэдээлэл өглөө.
Мөн Зэвсэгт хүчний 278 дугаар тусгай салбарын материаллаг баазыг түшиглэн цэргийн хэргийн анхан шатны мэдлэг олгох хээрийн сургалт, дадлагыг зохион байгуулж, галын болон химийн бэлтгэл, байр зүйн баримжаалал, эмнэлгийн тусламж, гар гранат, буудлагын бэлтгэлийн чиглэлээр оролцогчдыг дадлагажуулав. Түүнчлэн оролцогчдын бие бялдрын бэлтгэл, тэсвэр хатуужил, сахилга зохион байгуулалт, багаар ажиллах чадварыг нэмэгдүүлэх зорилгоор марш-тактикийн тэмцээн зохион байгуулав.
