Засгийн газраас хэрэгжүүлж буй “Чөлөөлье” үндэсний санаачилга, зөвшөөрлийн эрх зүйн орчны шинэчлэлийн хүрээнд “Зөвшөөрлийн эрх зүйн зохицуулалт, хэрэгжилт ба бизнесийн орчин” сэдэвт хэлэлцүүлэг энэ сарын 02-03-ны өдрүүдэд зохион байгуулагдаж байна.
Арга хэмжээний нээлтэд Хууль зүй, дотоод хэргийн дэд сайд Д.Мөнх-Эрдэнэ оролцож, үг хэллээ. Хэлэлцүүлэг нь Засгийн газрын 2026 оны 329 дүгээр тогтоолоор баталсан үйл ажиллагааны төлөвлөгөөний хэрэгжилтийг эрчимжүүлэх, зөвшөөрлийн тогтолцоог ил тод, ойлгомжтой, хүртээмжтэй болгох, төрийн байгууллагын хүнд суртлыг бууруулах, бизнесийн орчныг сайжруулах, иргэн, аж ахуйн нэгжийн эдийн засгийн эрх чөлөөг хангахад чиглэж байна.
Энэ хүрээнд Хууль зүй, дотоод хэргийн яам болон харьяа агентлаг, байгууллагууд, Эдийн засаг хөгжлийн яам, Засгийн газрын хяналт, хэрэгжүүлэх газар, Санхүүгийн мэдээллийн технологийн төв, И-Монголиа академи, Төрийн цахим үйлчилгээний зохицуулалтын газрын удирдлага болон албан хаагчид “Зөвшөөрлийн мэдээлэл, үйлчилгээний нэгдсэн төв”-д ажиллаж, зөвшөөрөлтэй холбоотой хууль тогтоомжийн хэрэгжилт, тулгамдаж буй асуудлыг хэлэлцэн, иргэн, хуулийн этгээдэд зөвлөгөө, мэдээлэл өгч, төрийн үйлчилгээг шуурхай хүргэж байна.
