УУЛЗАЛТ, ХЭЛЭЛЦҮҮЛЭГ ЗОХИОН БАЙГУУЛЛАА
Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс даатгуулагчид эмнэлгийн хуудас олгохтой холбоотой хууль тогтоомж, журмын хэрэгжилтийг хангах, эмнэлгийн хуудас бичих, олгох үйл ажиллагааг холбогдох эрхзүйн баримт бичгийн хүрээнд хэрэгжүүлэх, хяналт шалгалтаар илэрсэн зөрчил, дутагдлыг арилгах, арга зүйгээр хангах зорилгоор “Даатгуулагчид эмнэлгийн хуудас олгох журмын хэрэгжилтийг ханган ажиллахад анхаарах асуудал” сэдэвт цахим уулзалт, хэлэлцүүлгийг 2026 оны 10 дугаар сарын 30-ны өдөр зохион байгууллаа.
Уулзалт, хэлэлцүүлэгт тус газрын дэргэдэх Эрүүл мэндийн магадлалын төв зөвлөлийн дарга Т.Лхагвадорж болон гишүүд, нийслэлийн 8 дүүргийн Нийгмийн даатгалын газрын магадлагч эмч нар, эмнэлгийн хуудас бичиж, олгох эрх бүхий эрүүл мэндийн байгууллагын 800 гаруй эмч, мэргэжилтнүүд танхим болон цахимаар оролцлоо.
Цахим уулзалт, хэлэлцүүлгийг Нийгмийн даатгалын ерөнхий газрын дарга Б.Батжаргал нээж хэлсэн үгэндээ эмнэлгийн хуудсыг цахимжуулснаар иргэд даатгуулагчдад чирэгдэлгүй цаг, хугацаа хэмнэсэн, хяналт тавих нөхцөл бүрдсэнийг дурьдаж, холбогдох дүрэм журмын хэрэгжилтийг ханган ажиллахад анхаарахыг онцлов.
Тус уулзалт, хэлэлцүүлгийн хүрээнд 2022–2025 оны эмнэлгийн хуудасны бичилт, олголтын статистик мэдээлэлд хийсэн дүн шинжилгээ, эмнэлгийн хуудас бичилт, олголтын үндэслэлд хийсэн хяналт шалгалтын дүн, дүгнэлт болон “Даатгуулагчид эмнэлгийн хуудас олгох журам”-д нэмэлт, өөрчлөлт оруулах төслийг танилцуулж, санал солилцож хэлэлцэв.
Энэхүү уулзалт, хэлэлцүүлэг нь эмнэлгийн хуудас бичих, олгох, хянах үйл ажиллагаанд нэгдсэн ойлголт, арга зүйг төлөвшүүлэх, хяналт шалгалтаар илэрсэн зөрчил, дутагдлыг арилгах, цаашид анхаарах асуудал, сайжруулах арга замын талаар санал солилцож, нэгдсэн ойлголтод хүрснээрээ ач холбогдолтой боллоо.
