Сайнцагаан сумын Хүүхдийн төлөө зөвлөл, Хамтарсан баг хамтран Монгол Улсын Ерөнхий сайдын санаачилсан “Хүүхдийн төлөө – ЗА бол ЗААВАЛ хийе” үндэсний хөдөлгөөний хүрээнд “Гэр бүлийн өдөрлөг” зохион байгууллаа.
Өдөрлөгт Сайнцагаан сумын Засаг дарга бөгөөд Мандалговь хотын захирагч С.Бат-Оргил оролцож, сургалтад хамрагдсан гэр бүлүүдэд талархал илэрхийлэн, амжилт хүсэв.
Энэ үеэр “Дүүрэн бэлэг” хүүхдийн боловсролд үйлчлэх төв НҮТББ-ын захирал Б.Гэрэлсүрэн сумын 9 залуу гэр бүлийг хамруулан “Баяр хөөртэй гэр бүл” сургалт явууллаа.
Сургалтаар хөгжөөнт тоглоом, сонирхолтой үйл ажиллагаагаар дамжуулан гэр бүлийн эерэг харилцааг төлөвшүүлэх, харилцан ойлголцлыг нэмэгдүүлэхэд чиглэсэн агуулгыг хүргэв.
Мөн Хамтарсан багийн гишүүд гэр бүлүүдийн дунд дартсны тэмцээн зохион байгуулж, гэр бүлийн гишүүд хамтдаа цагийг үр бүтээлтэй, хөгжилтэй өнгөрүүлэх боломж бүрдүүлсэн юм.
“Гэр бүлийн өдөрлөг”-ийг сар бүр тогтмол зохион байгуулахаар төлөвлөж байгаа бөгөөд гэр бүлүүдийг идэвхтэй оролцож, эерэг харилцаа, харилцан хүндэтгэл, халуун дулаан уур амьсгалыг эрхэмлэн, аз жаргалтай гэр бүлийг хамтдаа бүтээхийг уриалж байна.
