Монгол Улсын Засгийн газрын 2026 оны 329 дүгээр тогтоолын хэрэгжилтийг хангах хүрээнд Гаалийн ерөнхий газраас Эдийн засгийн эрх чөлөөний тухай хууль, Зөвшөөрөл, мэдэгдлийн тухай хуулийг гадаад худалдаанд оролцогч аж ахуйн нэгжүүдэд сурталчлан таниулах арга хэмжээ 2026 оны 10 дугаар сарын 26-ны өдөр зохион байгууллаа. Арга хэмжээнд танхимаар 79, цахимаар 100, нийт 179 аж ахуйн нэгжийн төлөөлөл оролцлоо.

Энэ үеэр зөвшөөрлийн цахим систем болох license.mn-ээр хүсэлт илгээхэд анхаарах асуудлаар зөвлөгөө өгч, гаалийн эрх зүйн шинэчлэлийн хүрээнд боловсруулж буй журам, шалгуурын төсөлд аж ахуйн нэгжүүдийн саналыг авах ажлыг зохион байгууллаа. Мөн зөвшөөрөл сунгуулахад тавигдах шаардлагад орсон өөрчлөлтүүдийг танилцуулав.

✅ Тухайлбал, “татварын өр”, “нийгмийн даатгалын шимтгэлийн өр”-гүй байх шаардлагыг хассан бөгөөд зөвшөөрлийн хугацаа дуусахаас өмнөх нэг жилээс доошгүй хугацаанд зөрчил гаргаагүй аж ахуйн нэгж хялбаршуулсан горимоор хугацаа сунгуулах хүсэлт гаргасан тохиолдолд ажлын хоёр хоногт шийдвэрлүүлэх боломжтой болсон талаар мэдээлэл өглөө.

Түүнчлэн Эдийн засаг, хөгжлийн яамны дэргэдэх “Зөвшөөрлийн мэдээлэл, үйлчилгээний нэгдсэн төв”-д ГЕГ-ын холбогдох албан хаагчид долоо хоног бүрийн мягмар гарагт ажиллаж, гаалийн байгууллагын эрхлэх асуудлын хүрээнд олгодог зөвшөөрлийн талаар иргэн, хуулийн этгээдэд зөвлөгөө, мэдээлэл өгч байгаа юм.

📌ГЕГ-аас license.mn системээр дараах зөвшөөрөл, хүсэлтийг хүлээн авч, шийдвэрлэж байна. Үүнд:

✅Гаалийн баталгаат агуулахын үйл ажиллагаа эрхлэх;

✅Гаалийн баталгаат барилгын талбай ажиллуулах;

✅Гаалийн баталгаат үйлдвэрийн газар ажиллуулах;

✅Гаалийн баталгаат үзэсгэлэнгийн газар ажиллуулах;

✅Гаалийн тусгай бүс байгуулах;

✅Татваргүй барааны дэлгүүр ажиллуулах;

✅Гаалийн түр агуулах ажиллуулах;

✅Гаалийн хяналтын бүс тогтоолгох;

✅Тээвэрлэгч байгууллагад гаалийн итгэмжлэл олгох.

Цахим систем нэвтэрснээр аж ахуйн нэгжүүд цаг хугацаа, орон зайнаас үл хамааран хүсэлтээ цахимаар илгээх, хүсэлтийн явц болон гаалийн байгууллагын хяналт, шийдвэрлэлтийн төлөвийг системээр хянах боломж бүрдсэн байна