Монгол Улсын Гавьяат дасгалжуулагч, улсын начин Должингийн Адъяатөмөрийн нэрэмжит өсвөрийн чөлөөт бөхийн U-12-14, U15-17 нас, сонгомол бөхийн U-17 насны ангиллын олон хотын анхдугаар тэмцээн Налайх дүүргийн Спорт цогцолборт 10 дугаар сарын 23-25-ны өдрүүдэд амжилттай зохион байгуулагдлаа.
Тус тэмцээнд 18 аймаг, 9 дүүргийн 450 гаруй тамирчин хурд хүч, авхаалж самбаагаа сорин өрсөлдлөө. Тэмцээн чөлөөт бөхийн 41 жин, сонгомол бөхийн U17 насны 2 жингээр явагдсан бөгөөд багийн нэгдсэн дүнгээр
✅️Дархан-Уул аймаг 523 оноогоор 1-р байр,
✅️✅️Спортын төв сургууль 430 оноогоор 2-р байр,
✅️✅️✅️Налайх дүүргийн баг тамирчид 414 оноогоор гуравдугаар байранд шалгарлаа.
Уг тэмцээнийг Монгол Улсын Гавьяат дасгалжуулагч, улсын начин Должингийн Адъяатөмөрийн үр хүүхдүүд, Чөлөөт бөхийн "Тас" клуб санаачилан Чөлөөт бөхийн холбоо, Налайх дүүргийн Спортын хороотой хамтран зохион байгуулсан бөгөөд чөлөөт бөхийн спортыг хүүхэд залуучуудад сурталчлан таниулах, хичээллэгчдийн тоог нэмэгдүүлэх, шинэ залуу тамирчдыг нээн илрүүлэх, тамирчдын ур чадварыг сайжруулах, өсвөрийн бөхчүүдийн арга техник, ур чадварыг судлах, харилцан туршлага солилцох зорилготой юм.
Жин тус бүрийн аварга тамирчдыг медаль, өргөмжлөл, мөнгөн шагналаар шагнаж, насны ангилал тус бүрийн шилдэг тамирчдад өргөмжлөл, үнэ бүхий зүйлийг дурсгав.
