“Мансуурах эм, сэтгэцэд нөлөөт бодисын хууль бус эргэлттэй тэмцэх үндэсний хорооны 2026 оны үйл ажиллагааны төлөвлөгөө”-ний хүрээнд мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх, хорт зуршлаас ангид шинэ үеийг төлөвшүүлэх зорилгоор Төв аймгийн 27 сумын ерөнхий боловсролын сургууль, политехник коллежийн нийгмийн ажилтан, багш, сэтгэл зүйчдийг чадавхжуулах сургалтыг зохион байгууллаа.

Сургалтыг ЦЕГ-ын Хар тамхитай тэмцэх албаны ахлах мэргэжилтэн, Цагдаагийн ахлах дэслэгч Б.Ариунтөгс явуулж, мансууруулах эм, сэтгэцэд нөлөөт бодисын хор уршиг, түүнээс үүдэлтэй гэмт хэрэг, зөрчлөөс урьдчилан сэргийлэх, хүүхэд, өсвөр үе болон суралцагчдыг хорт зуршлаас хамгаалах, эрсдэлт нөхцөл байдлыг эрт илрүүлэх, урьдчилан сэргийлэх арга зүйн талаар мэдлэг, мэдээлэл олголоо.

Энэхүү сургалт нь боловсролын байгууллагын түвшинд урьдчилан сэргийлэх ажлыг эрчимжүүлэх, хүүхэд, өсвөр үе, залуучуудыг мансууруулах эм, сэтгэцэд нөлөөт бодисын хэрэглээ болон бусад хорт зуршлаас ангид байлгах, эрүүл, зөв дадал хэвшилтэй иргэн болгон төлөвшүүлэхэд чиглэсэн хамтын ажиллагааг бэхжүүлэх ач холбогдолтой юм.