Соёл, спорт, аялал жуулчлал, залуучуудын яам, агентлаг, харьяа байгууллага, аймгийн Соёл, урлаг, аялал жуулчлал, залуучуудын газар, Биеийн тамир, спортын газрын Эцэг, эхийн зөвлөл, Эрсдэлийн хяналтын хороо, хүний нөөц болон хүүхэд хамгааллын асуудал хариуцсан албан хаагчдад зориулсан сургалтыг цахим болон танхимын хосолсон хэлбэрээр зохион байгууллаа.
Сургалтад нийт 140 удирдлага, албан хаагч хамрагдаж, Монгол Улсын Ерөнхий сайдын санаачилсан “Хүүхдийн төлөө – За бол заавал хийе” үндэсний хөдөлгөөний хэрэгжилт, хүүхэд хамгааллын тогтолцоо, эрсдэлийн үнэлгээ, хэрэгжилт, тайлагналын чиглэлээр мэдээлэл, арга зүйн зөвлөгөө авлаа.
Сургалтын үеэр Гэр бүл, хөдөлмөр, нийгмийн хамгааллын яамны Гэр бүлийн бодлогын газрын шинжээч “Хүүхдийн төлөө – За бол заавал хийе” үндэсний хөдөлгөөний хэрэгжилт, үр дүнг тайлагнах аргачлал, хүүхэд хамгаалал болон эрсдэлийн үнэлгээ хийх асуудлаар мэдээлэл өгч, танилцуулга хийв.
Мөн Соёл, спорт, аялал жуулчлал, залуучуудын яамны Салбарын хяналт-шинжилгээ, үнэлгээ, дотоод аудитын газрын дарга бөгөөд Эрсдэлийн хяналтын хорооны дарга үндэсний хөдөлгөөний хэрэгжилтийг эрчимжүүлэх, хүүхэд хамгааллын чиглэлээр байгууллагуудын уялдаа холбоо, хариуцлагыг сайжруулан ажиллах талаар холбогдох чиглэл өглөө.
