Төрийн албан хаагчийн ёс зүйн тухай хууль, “Төрийн албан хаагчийн ёс зүйн зөрчлөөс урьдчилан сэргийлэх, соён гэгээрүүлэх үндэсний хөтөлбөр” болон байгууллагын 2026 оны сургалт, соён гэгээрүүлэх ажлын төлөвлөгөөний хүрээнд алба хаагчдын ёс зүйн талаарх мэдлэг, ойлголтыг дээшлүүлэх, ёс зүйн зөрчлөөс урьдчилан сэргийлэх, хамт олны дунд эерэг харилцаа, зөв хандлагыг төлөвшүүлэх зорилгоор Шүүх шинжилгээний байгууллагын 2026 оны сахилга, ёс зүйн зөвлөгөөнийг зохион байгууллаа.

Зөвлөгөөнд Монгол Улсын Ёс зүйн хорооны дарга, доктор (Ph.D) Ц.Амартөгс, Монгол Улсын Ёс зүйн хорооны Захиргаа, эрх зүйн хэлтсийн дарга Б.Нарангарав, Гомдол, мэдээлэл хариуцсан референт Д.Мөнхбат, Мэдээлэл, дүн шинжилгээний хэлтсийн Судалгаа, дүн шинжилгээ хариуцсан Ахлах шинжээч Г.Батчимэг, Шүүх шинжилгээний байгууллагын удирдлагууд, Ёс зүйн дэд хорооны гишүүд болон алба хаагчид оролцлоо.

Энэ удаагийн зөвлөгөөнийг Монгол Улсын Ёс зүйн хороотой хамтран, өмнөх онуудаас шинэлэг хэлбэрээр зохион байгуулж байгаагаараа онцлог болохыг байгууллагын удирдлагууд тэмдэглэв.

Зөвлөгөөний үеэр Монгол Улсын Ёс зүйн хорооноос “Ёс зүйн гомдол, мэдээллийг хянан шийдвэрлэх ажиллагаа”, “Төрийн албан хаагчийн ёс зүйн эрсдэлийн үнэлгээ, аргачлал”, “Байгууллагын ёс зүй, сахилга хариуцлагын үнэлгээний шалгуур үзүүлэлт, аргачлал” сэдвүүдийн хүрээнд сургалт, мэдээлэл хийж, байгууллагын алба хаагчдын сахилга, ёс зүйн тулгамдаж буй асуудал, тэдгээрийг шийдвэрлэх арга замын талаар хэлэлцүүлэг өрнүүллээ.

Энэхүү зөвлөгөөн нь алба хаагчдын ёс зүйн талаарх мэдлэг, ойлголтыг нэмэгдүүлэх, хууль тогтоомжийн хэрэгжилтийг хангах, байгууллагын хэмжээнд сахилга, хариуцлагыг бэхжүүлэх, ёс зүйн зөрчлөөс урьдчилан сэргийлэх үйл ажиллагааны үр нөлөөг дээшлүүлэхэд чухал ач холбогдолтой болж өндөрлөлөө.