
Хөдөлмөрийн аюулгүй байдал, эрүүл мэндийн төвөөс Монголын Мэргэжлээс Шалтгаалах Өвчин Судлалын Нийгэмлэгтэй хамтран “Тоосны шалтгаант амьсгалын эрхтний эмгэгийн урьдчилан сэргийлэлт ба менежмент” сэдэвт, багц цагийн сургалтыг энэ оны 10-р сарын 15–17-ны өдрүүдэд амжилттай зохион байгууллаа.
Сургалтад үйлдвэр, уурхайн эмч болон ХАБЭМТ-ийн эмч, эрүүл ахуйч мэргэжилтнүүд зэрэг нийт 15 хүн хамрагдлаа.
Тус сургалт нь ажлын байрны тоосны өртөлтөөс шалтгаалсан амьсгалын эрхтний эмгэгээс урьдчилан сэргийлэх, эрт илрүүлэх, оношлох, ялган оношлох, эмчлэх, хянах чиглэлээр оролцогчдын мэдлэг, ур чадварыг дээшлүүлэх, ажилтны эрүүл мэндэд үзүүлэх тоосны өртөлтийн сөрөг нөлөөллийг бууруулахад чиглэв.
Үүний хүрээнд үйлдвэрлэлийн тоосны төрөл, ангилал, хүний эрүүл мэндэд үзүүлэх нөлөөлөл, ажлын байрны тоосны өртөлтийн хэмжилт, үнэлгээ, лабораторийн шинжилгээний арга зүй, өртөлтийг бууруулах, хянах арга хэмжээ, амьсгал хамгаалах хэрэгслийн сонголт, зөв хэрэглээний талаар онол, дадлагыг хослуулсан сургалтыг зохион байгуулснаараа онцлог юм.
Мөн силикоз, пневмокониоз, асбестоз зэрэг тоосны өртөлттэй холбоотой мэргэжлээс шалтгаалсан амьсгалын эрхтний эмгэгийн эмнэлзүйн онцлог, оношилгоог ялган, эмчилгээ, оношилгоо, хяналт, болон ажилтны эрүүл мэндийн урьдчилан сэргийлэх үзлэг, тандалт, бүртгэлийн асуудлыг хамруулж, тухайн тохиолдолд суурилсан хэлэлцүүлэг, практик дадлагаар оролцогчдын мэдлэг, ур чадварыг бататгав.
Энэхүү сургалт нь үйлдвэр, уурхайн болон хөдөлмөрийн аюулгүй байдал, эрүүл мэндийн чиглэлээр ажиллаж буй эмч, эрүүл ахуйчдын мэргэжлийн чадавхыг бэхжүүлэх, ажлын байрны тоосны өртөлтийг үнэлэх, хянах, тоосны шалтгаант амьсгалын эрхтний эмгэгийг эрт илрүүлэх, оношилгоо, хяналтыг сайжруулах, урьдчилан сэргийлэх арга хэмжээг үр дүнтэй хэрэгжүүлэхэд чухал ач холбогдолтой.
Түүнчлэн ажилтны эрүүл мэндийг хамгаалах, мэргэжлээс шалтгаалсан өвчний эрсдэлийг бууруулахад хувь нэмэр оруулах юм.