Нийтийн тээврийн салбарын жолооч нарын ур чадварыг сорих, мэргэжлийн мэдлэг, ур чадварыг дээшлүүлэх зорилготой Нийслэлийн Засаг даргын нэрэмжит “Уран жолоодлого-2026” тэмцээн өнөөдөр Монгол наадам цогцолборт эхэллээ.

Тэмцээнийг Нийслэлийн Засаг дарга бөгөөд Улаанбаатар хотын захирагч Б.Пүрэвдагва нээж, оролцож буй баг, тамирчдад амжилт хүслээ.

Тус тэмцээнийг нийтийн тээврийн үйлчилгээ эрхлэгч байгууллагуудын автобусны жолооч нарын дунд тав дахь жилдээ уламжлал болгон зохион байгуулж байна. Энэ нь жолооч нарын харилцаа, хандлагыг төлөвшүүлэх, Замын хөдөлгөөний дүрмийн хэрэгжилтийг сайжруулах, жолоодлогын ур чадварыг нэмэгдүүлэхийн зэрэгцээ нийтийн тээврийн үйлчилгээний талаарх эерэг ойлголтыг олон нийтэд түгээн дэлгэрүүлэх зорилготой юм.

Энэ жилийн тэмцээнд нийтийн тээврийн үйлчилгээ үзүүлэгч 9 аж ахуйн нэгж, байгууллагын баг оролцож, жолоодлогын ур чадвар, мэргэжлийн мэдлэгээрээ өрсөлдөж байна. Үүнд:

• “Зорчигч тээвэр нэг” ОНӨААТҮГ

• “Зорчигч тээвэр хоёр” ОНӨААТҮГ

• “Зорчигч тээвэр гурав” ОНӨААТҮГ

• “Зорчигч тээвэр дөрөв” ОНӨААТҮГ

• “Зорчигч тээвэр тав” ОНӨААТҮГ

• “Автотерминал трейд” ХХК

• “Сайхан-Ирээдүй” ХХК

• “Сутайн буянт” ХХК

• “ЕБус нэгдүгээр бааз” ХХК

Нийтийн тээврийн үйлчилгээний чанар, аюулгүй байдал нь жолооч бүрийн мэдлэг, ур чадвар, хариуцлага, зөв хандлагаас эхэлдэг. Тэмцээнд оролцож буй нийт баг, тамирчдадаа амжилт хүсье!

Алтан шар зам тань өлзийтэй байх болтугай!