Монгол улсын Засгийн газраас хэрэгжүүлж буй “Чөлөөлье” санаачилгын хүрээнд 2022 оны 6 р сарын 17-нд батлагдан мөрдөгдөж байсан Зөвшөөрлийн тухай хуулийг 2026 оны 7 р сарын 3-нд “Зөвшөөрөл, мэдэгдлийн тухай хууль” нэртэйгээр нэмэлт өөрчлөлт оруулж, 2026 оны 8 дугаар сарын 31-ээс орон даяар мөрдөж эхлээд байгаа юм. Тус хуулийн шинэчилсэн найруулгаар мөрдөгдөж буй, зөвшөөрөл олгох, сунгах, түдгэлзүүлэх, хүчингүй болгох болон мэдэгдлээр эрхлэх үйл ажиллагааг зохицуулах гол хууль гэж ойлгож болно. Тус хуулийн хэрэгжилт нийслэлийн 9 дүүрэг, 21 аймагт хөрсөн дээр хэрхэн бууж хэрэгжиж байгаа талаар Засгийн газрын Хяналт хэрэгжүүлэх газар хяналт тавьж, хоёр удаагийн Засгийн газрын хуралд тайлан, мэдээлэл өгч ажиллаж байгаа юм.
Засгийн газрын 2026 оны 10 дугаар сарын 14-ний өдрийн хуралдаанаас өгсөн үүрэг чиглэлийн дагуу өнөөдөр Засгийн газрын Хяналт хэрэгжүүлэх газар 21 аймгийн засаг даргын орлогч болон, Тамгын газрын дарга нарт цахимаар уулзалт зохион байгуулж, Зөвшөөрөл, мэдэгдлийн тухай хуулийн хэрэгжилтийн явц ямар байгаа, ямар асуудлууд гарч байгаа, www.license.mn, www.e-business.mn системүүдэд орон нутгийн удирдлагын зүгээс зөвшөөрөлтэй холбоотой өөрчлөлтүүдийг яаралтай хийхийг сануулж, сургалт, мэдэгдэл хийсэн юм. 14 хоногийн дараа эргэн үр дүнг дүгнэж, шаардлагатай тохиолдолд Засгийн газрын Хяналт хэрэгжүүлэх газрын ажлын хэсэг газар дээр нь очиж ажиллах, Ерөнхий сайд болон Эдийн засгийн хөгжлийн сайдын тушаалаар хяналт шалгалтын ажлыг эхлүүлэх, хүндрэл чирэгдэл учруулж, хуулийг хэрэгжүүлж ажиллаагүй албан хаагчийн нэр, албан тушаалыг Засгийн газрын хуралдаанд танилцуулах, арга хэмжээ авах талаарх мэдээллийг өглөө.
Зөвшөөрөл, мэдэгдлийн тухай хуулийн хүрээнд зөвшөөрөл 30 шаардлагыг 15 болгон цөөлж, 50 хувь бууруулсан, 38 тусгай болон энгийн зөвшөөрлийг хүчингүй болгосон, мэдэгдээд 48 цагийн дотор үйл ажиллагаа явуулж эхлэх боломжийг бүрдүүлсэн гэх мэт иргэд, бизнес эрхлэгчдийг дэмжих 30 гаруй арга хэмжээ багтсан байгаа юм.
