
Хөдөлмөрийн аюулгүй байдал, эрүүл мэндийн төв болон Монголын хөдөлмөрийн эрүүл ахуйчдын үндэсний холбооны төлөөлөл, хурлын зохион байгуулагчид болон оролцогчдын төлөөлөл ANOH 2026 олон улсын хурлын үр дүнг хэлэлцэн, цаашид хэрэгжүүлэх ажлын талаарх эргэн уулзалтыг энэ оны 10-р сарын 14-ний өдөр зохион байгууллаа.
Уулзалтын үеэр хурлын зохион байгуулалт, оролцогчдын бүрэлдэхүүн, эрдэм шинжилгээний илтгэлүүдийн агуулга, олон улсын мэргэжлийн зэрэг олгох, гэрчилгээжүүлэх тогтолцоо болон хөдөлмөрийн эрүүл ахуйн салбарын хөгжлийн чиг хандлагын талаар хэлэлцэв. Түүнчлэн хурлаас дэвшүүлсэн санал, санаачилгыг бодит ажил хэрэг болгох, олон улсын туршлага, судалгааны үр дүнг үндэсний түвшинд нэвтрүүлж, практик үйл ажиллагаанд ашиглахын ач холбогдлыг онцоллоо.
Тухайн уулзалтаар цаашид дараах чиглэлээр ажил хэрэгжүүлэх боломжийг судалж, санал солилцов.
Мэргэжлийн зэрэг, гэрчилгээжүүлэлтийн эрх зүйн зохицуулалтыг боловсронгуй болгох:
-Олон улсад хүлээн зөвшөөрөгдсөн мэргэшсэн хөдөлмөрийн эрүүл ахуйчийн зэргийг Монгол Улсад хүлээн зөвшөөрөх боломж, эрх зүйн орчныг судалж, холбогдох дүрэм, журамд нэмэлт, өөрчлөлт оруулах санал боловсруулах. Тухайлбал, хөдөлмөрийн нөхцөлийн үнэлгээний ажлыг удирдах болон байгууллагын хөдөлмөрийн эрүүл ахуйн нэгжийг удирдах ажилтанд тавигдах мэргэшлийн шаардлагыг тодорхойлох асуудлыг судалж, холбогдох яаманд санал хүргүүлэх.
Судалгааны үр дүнг практик үйл ажиллагаанд ашиглах, тогтмол хэлэлцүүлэг зохион байгуулах:
-ANOH 2026 олон улсын эрдэм шинжилгээний бага хуралд ирүүлсэн 98 эрдэм шинжилгээний хураангуй, холбогдох илтгэл, судалгааны үр дүнтэй танилцаж, тэдгээрийг төвийн үйл ажиллагаанд ашиглах боломжийг судлах. Хэлэлцүүлгээс гарсан санал, зөвлөмжийг цаашдын судалгаа болон практик үйл ажиллагаанд тусган хэрэгжүүлэх.
Шинэ технологи, инженерийн шийдлийг судлах:
-Тоосжилтыг бууруулах технологи, уурхайн техник хэрэгслийн бүхээгийн битүүмжлэл, агааржуулалтыг сайжруулах инженерийн шийдэл боловсруулсан байгууллагуудтай холбоо тогтоож, технологи, шийдлийн танилцуулга зохион байгуулах. Эдгээр технологийг үйлдвэрлэлийн ажлын байранд нэвтрүүлэх боломжийг судалж, өртөлтийг бууруулах үр нөлөөг хэмжилт, шинжилгээний үр дүнд үндэслэн үнэлэх аргачлалыг тодорхойлох.
Хэмжилт, шинжилгээний чадавхыг бэхжүүлэх:
Хөдөлмөрийн эрүүл ахуйн лабораторийн хэмжилт, шинжилгээний чанарын баталгаажуулалт, ур чадварын сорилт, лавлагаа шинжилгээний чиглэлээр олон улсын мэргэжлийн байгууллагуудтай хамтран ажиллах боломжийг судалж, лабораторийн чадавхыг сайжруулах санал боловсруулах.
Өртөлтийн хяналт, ажилтны эрүүл мэндийн тандалтыг сайжруулах:
Тоос, талст цахиур, асбестын өртөлтийн хэмжилт, хяналтыг сайжруулах, өртөлтийг бууруулах инженерийн арга хэмжээний хэрэгжилтийг эрчимжүүлэх чиглэлээр санал боловсруулах. Мөн хөдөлмөрийн нөхцөлийн үнэлгээ, ажилтны эрүүл мэндийн тандалт, мэргэжлээс шалтгаалсан өвчний бүртгэлийн мэдээллийн уялдаа холбоог сайжруулах, алслагдсан ажлын байр болон албан бус хөдөлмөр эрхлэгчдэд хөдөлмөрийн эрүүл ахуйн үйлчилгээг хүртээмжтэй хүргэх боломжийг судлах.
Хурлын үр дүнг нэгтгэж, цаашид хэрэгжүүлэх ажлыг төлөвлөх:
-ANOH 2026 олон улсын эрдэм шинжилгээний бага хурлаас гарсан санал, санаачилга, хамтын ажиллагааны боломжуудыг нэгтгэн, цаашид хэрэгжүүлэх ажлыг ач холбогдлоор нь эрэмбэлж, хариуцах байгууллага, нэгжийг тодорхойлох. Мөн хурлын үр дүнгийн тайлан болон цаашид хэрэгжүүлэх ажлын санал боловсруулж, холбогдох яам, байгууллагуудад албан бичгээр хүргүүлэх зэрэг ажлуудыг төлөвлөөд байна.
Энэхүү эргэн уулзалтаар ANOH 2026 олон улсын эрдэм шинжилгээний бага хурлаас дэвшүүлсэн санал, санаачилгыг нэгтгэн, цаашид хэрэгжүүлэх ажлын үндсэн чиглэлүүдийг тодорхойллоо. Цаашид олон улсын туршлага, судалгааны үр дүнг ажилтны эрүүл мэндийг хамгаалах, хөдөлмөрийн нөхцөлийг сайжруулах, мэргэжлээс шалтгаалсан өвчнөөс урьдчилан сэргийлэх үйл ажиллагаанд үр дүнтэй ашиглах чиглэлээр хамтын ажиллагаагаа өргөжүүлэх талаар санал солилцсон үр дүнтэй уулзалт болж өнгөрлөө.