Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн Ажлын алба, Хууль зүйн үндэсний хүрээлэн хамтран “Гэмт хэрэг, зөрчлөөс урьдчилан сэргийлэх тухай хуулийн хэрэгжилтийн үр дагаврын үнэлгээ” судалгааны тайлангийн хэлэлцүүлгийг өнөөдөр /2026.10.14/ зохион байгууллаа.

Хуулийн хэрэгжилтийн үр дагаврыг таван жил тутам үнэлдэг бөгөөд энэ удаагийн судалгааг Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны захиалгаар, Нийслэлийн салбар зөвлөлийн санхүүжилтээр Хууль зүйн үндэсний хүрээлэн гүйцэтгэсэн юм.

Хэлэлцүүлгийг нээж, ГХУСАЗЗАА-ны Захиргаа, удирдлагын газрын дарга И.Баатархүү, Хууль зүйн үндэсний хүрээлэнгийн захирал Н.Жамъянхүү нар үг хэлэв. Энэ үеэр гэмт хэрэг, зөрчлөөс урьдчилан сэргийлэхэд гэмт хэрэг гарсны дараа бус гарахаас өмнө урьдчилан сэргийлэхэд түлхүү анхаарч, нэгдсэн бодлого, уялдаа холбоотой хамтын ажиллагааг хэрэгжүүлэх нь чухал болохыг онцоллоо.

Хэлэлцүүлгийн эхний хэсэгт Хууль зүйн үндэсний хүрээлэнгийн Эрүүгийн эрх зүй, криминологийн секторын эрдэм шинжилгээний ахлах ажилтан Х.Буянбат судалгааны үйл явц, үр дүнг танилцуулав. Тэрбээр, гэмт хэргээс урьдчилан сэргийлэх ажлын үндсэн чиглэл, хамрах хүрээ, эрх зүйн зохицуулалт, иргэд, олон нийтийн оролцоог хангах асуудал болон санхүүжилтийн талаар мэдээлэл өглөө.

Хоёрдугаар хэсгийг тус хүрээлэнгийн Эрүүгийн эрх зүй, криминологийн секторын эрдэм шинжилгээний ахлах ажилтан Ц.Очгэрэл удирдаж, Гэмт хэрэг, зөрчлөөс урьдчилан сэргийлэх тухай хуулийн зургадугаар бүлэгт заасан хорих ял эдлээд суллагдсан хүнд хяналт тогтоох зохицуулалтын хэрэгжилтийн үр дагаврын үнэлгээний талаар танилцуулга хийлээ.

Энэ хүрээнд хорих байгууллагаас суллагдсан хүнд хяналт тогтоох үйл ажиллагааны практик хэрэгжилт, эрх зүйн зохицуулалт, байгууллага хоорондын хамтын ажиллагаа, суллагдсан хүнийг нийгэмшүүлэхтэй холбоотой тулгамдаж буй асуудлыг хөндөж, тэдгээрийг шийдвэрлэх арга замын талаар оролцогчид санал солилцон хэлэлцүүлэг өрнүүлэв.

Хэлэлцүүлгийн төгсгөлд Хууль зүйн үндэсний хүрээлэнгээс оролцогчдын санал, шүүмж болон хөндсөн асуудлуудыг судалгааны тайланд нэгтгэн тусгаж, салбар дундын уялдаа холбоог хангах стратеги боловсруулж, зөвлөмж хүргүүлэхээ мэдэгдлээ.

Энэхүү судалгааны үр дүн нь гэмт хэрэг, зөрчлөөс урьдчилан сэргийлэх эрх зүйн зохицуулалтын хэрэгжилтийг сайжруулах, байгууллага хоорондын хамтын ажиллагааг бэхжүүлэх, урьдчилан сэргийлэх ажлын үр нөлөөг нэмэгдүүлэх чиглэлээр бодлого, шийдвэр боловсруулахад чухал ач холбогдолтой юм.

Хэлэлцүүлэгт Гэмт хэргээс урьдчилан сэргийлэх ажлыг зохицуулах зөвлөлийн гишүүн байгууллагууд, салбар зөвлөлүүд, төрийн болон төрийн бус, иргэний нийгмийн байгууллагын төлөөлөл оролцлоо.