Дундговь аймгийн Хулд, Эрдэнэдалай суманд 1 сая ам.долларын санхүүжилтээр хэрэгжих “УХААЛАГ-Малчин” төслийн нээлтэд аймгийн Засаг дарга С.Мөнхчулуун оролцлоо.
“Цагаан алт” үндэсний хөдөлгөөний хүрээнд хэрэгжих тус төсөл нь малчдын уур амьсгалын өөрчлөлтөд дасан зохицох чадавхыг нэмэгдүүлэх, бэлчээр, усны нөөцийн менежментийг сайжруулах, тэжээл үйлдвэрлэл болон мал аж ахуйд шинэ арга, технологи нэвтрүүлэхэд чиглэнэ.
Засаг дарга С.Мөнхчулуун төслийн үр өгөөжийг малчин өрхүүдэд бодитоор хүргэж, бусад суманд түгээн дэлгэрүүлэх сайн туршлага бий болгоход аймаг, сумдын зүгээс дэмжин хамтран ажиллахаа илэрхийллээ.
Төсөл Дундговийн Хулд, Эрдэнэдалай, Баянхонгорын Баянлиг, Бууцагаан сумын нийт 4,000 орчим малчин өрхөд хүрч ажиллахаар төлөвлөжээ. Дасан зохицох сангийн буцалтгүй тусламжаар Ерөнхийлөгчийн Тамгын газар, Хөдөө аж ахуйг хөгжүүлэх олон улсын сан (IFAD) хамтран, НҮБ-ын Аж үйлдвэр хөгжлийн байгууллагын (UNIDO) техникийн туслалцаатайгаар хэрэгжүүлнэ.
